Chitwan Post Epaper
विश्व

अमेरिकाले संरक्षणवादी नीति लिएको भारतको आरोप

  नयाँदिल्ली । भारतको वाणिज्यमन्त्री आनन्द शर्माले अमेरिकाले अस्वीकार्य व्यापार संरक्षणवादको नीति लिएको आरोप लगाउनुभएको छ । यसबीच दुई मुलुकबीच तीतो कूटनीतिक विवादपछि सम्बन्ध सुधार गर्न अमेरिकी अधिकारीहरु भारतको भ्रमणमा आउने भएका छन् ।
वाणिज्यमन्त्री शर्माले नयाँदिल्लीले बौद्विक सम्पत्तिसम्बन्धी विश्व व्यापार सङ्गठनको नियम पूर्णतया पालना गरिरहेको र उसले प्याटेन्ट (स्वत्व) का विषयमा कडा उपाय कहिल्यै स्वीकार नगर्ने बताउनुभयो ।
उहाँले एक पत्रकार सम्मेलनमा अमेरिका प्रमुख आर्थिक तथा रणनीतिक साझेदार भए पनि अमेरिकाले केही विषयमा उच्च तथा अस्वीकार्य संरक्षणवादी नीति अवलम्बन गरिरहेको भारतले विश्वास गरेको बताउनुभयो ।
न्यूयोर्कमा डिसेम्बर महिनामा भारतीय कूटनीतिज्ञ पक्राउ परेपछि दुई मुलुकबीचको विवादपछि दक्षिण तथा मध्य एसियाका लागि अमेरिकी सहायक विदेशमन्त्री निशा डी विश्वास नयाँदिल्लीको भ्रमणको तयारीमा हुनुहुन्छ । उहाँ यस अवधिमा भारतको भ्रमण गर्न चाहने सबैभन्दा उच्चपदस्थ अधिकारी हुनुहुन्छ ।
भारतमा जन्मेका यी अधिकारीले भारत आइपुग्नुपहिले कूटनीतिक विवादपछि दुई मुलुक अगाडि बढ्न खोजे पनि उनीहरुले वास्तविक चुनौती भोगेको बताउनुभयो । न्यूयोर्कमा भारतीय कूटनीतिज्ञ देवयानी खोब्रागडेलाई निजका घरेलु कामदारलाई अमेरिकामा प्रवेशाज्ञा प्राप्त गर्दा गलत विवरण दिएको आरोपमा पक्राउ गरी नाङ्गो पारी खोजतलास गरिएको थियो ।
भारतीय कूटनीतिज्ञको पक्राउ तथा उहाँलाई गरिएका व्यवहारका कारण विश्वका दुई ठूला प्रजातन्त्रबीच वर्षौंपछि सबैभन्दा नराम्रो विवाद भएको थियो । यसका कारण जनवरी महिनामा भारतले अमेरिकी दूतावासका कर्मचारी र उनीहरुको अभिरूचिलाई लक्ष्य बनाउँदै अनेकौँ पाइला लिएको थियो ।
यसबीच, भारतीय तथा अमेरिकी अधिकारीले एकअर्को मुलुकको भ्रमण गर्ने अनेकौँ कार्यक्रम रद्द भएका थिए र नयाँ व्यापार विवादले दुई मुलुकबीचको सम्बन्ध अझै जटिल बनाएको छ ।
वाणिज्यमन्त्री शर्माले भारतको औषधि उत्पादनको क्षेत्रमा अमेरिकाले बौद्विक सम्पत्ति संरक्षणका विषयमा गुनासो गरेको र यसले दुई मुलुकलाई अझै पर लगेको बताउनुभयो ।
भारतमा ‘जेनेरिक’ औषधि उत्पादन गर्ने ठूलो उद्योग रहेको छ, जसले विकासशील मुलुकका लागि जीवन जोगाउने औषधि उत्पादन गरिरहेको छ ।
वाणिज्यमन्त्री शर्माले भारतले विश्व व्यापार सङ्गठनको सन् २००५ को सम्झौताको बौद्विक सम्पत्तिको व्यापार सम्बन्धित सम्झौता (ट्रिप्स) लाई पूर्णतया पालना गर्ने, तर कहिल्यै ‘ट्रिप्स–प्लस’ लाई स्वीकार नगर्ने बताउनुभयो ।
प्याटेन्टका अधिकारका वकालतकर्ताहरुले अमेरिकाले भारत तथा थाइल्यान्डजस्ता जेनेरिक औषधि उत्पादन गर्ने मुलुकले अर्बुद तथा अन्य जीवन जोखिममा पार्ने रोगका औषधिको उत्पादन कम गरोस् भन्ने चाहेको बताएका छन् । मन्त्री शर्माले भारतले तिर्न सकिने मूल्यमा जीवन जोगाउने औषधि उपलब्ध गराइरहेको दाबी गर्नुभयो ।
भारतको तीनदिने भ्रमणअघि सहायक विदेशमन्त्री विश्वासले भारतले प्याटेन्टलाई बलियो संरक्षण दिनुपर्ने विषयमा दी टाइम्स अफ इन्डिया समाचारपत्रमा लेख प्रकाशन गर्नुभएको थियो ।
भारत तथा अमेरिकाबीचको व्यापार १०० अर्ब अमेरिकी डलर पुग्ने अवस्थामा उहाँले व्यापारिक आदानप्रदान विस्तार गर्न थप खुला वातावरण सिर्जना गर्ने समय आएको बताउनुभएको थियो । रासस÷एएफपी

Comments
Click to comment

Leave a Reply

Your email address will not be published.

This site uses Akismet to reduce spam. Learn how your comment data is processed.

धेरै पटक हेरिएको

Chitwan Post Epaper

सम्पर्क

चितवन पोष्ट, दैनिक समाचार पत्र
नारायणगढ, चितवन

फोनः ०५६-५७१४९२

फ्याक्स:  ०५६-५७११२०

इमेल: postchitwan@gmail.com

Chitwan Post Epaper
AmazingCounters.com

© २०१०-२०१८ चितवन पोष्ट - दैनिक समाचारपत्र | सर्वाधिकार सुरक्षित. वेब तथा होस्टिङ सेवा: नमस्टेक

To Top