माडी । दक्षिण चितवनको माडी उपत्यकामा माछाको पहिलो ह्याचरी फार्म खुलेको छ । जिल्ला कृषि विकास कार्यालय चितवनको सहयोगमा स्थानीय माछा व्यवसायी मनिराम चौधरीले ह्याचरी फार्म निर्माण गर्नुभएको हो ।
माडी क्षेत्र चितवन जिल्लामै माछाको पकेट क्षेत्र मानिन्छ । भरतपुर सदरमुकामबाट ४० किलोमिटर दक्षिणमा पर्ने यो क्षेत्रमा अन्य क्षेत्रबाट माछाका भुरा ल्याउँदा विभिन्न समस्या आउने गरेकाले माडीलाई नै केन्द्रित गरेर ह्याचरी निर्माण गरिएको चौधरीले बताउनुभयो ।
अहिलेसम्म सो क्षेत्रका स्थानीय ७० किलोमिटर टाढा पर्ने चितवनको भण्डाराबाट माछाका भुरा ल्याएर पाल्दै आएका थिए । माछा ह्याचिङको तयारी भएको उहाँले बताउनुभयो । माडी उपत्यकामा चार गाविस छन् । सो क्षेत्रमा डेढ सय हेक्टरभन्दा बढीमा माछापालन गरिँदै आएको स्थानीय दिनेश अधिकारीले बताउनुभयो ।
माडीको गोपालनगर नेपालमै माछापालनका लागि उत्कृष्ट छ । माडीमा पहिलो खोलिएको ह्याचरी फार्ममा कृषि कार्यालयले रु एक लाख सहयोग गरेको कार्यालयकी प्राविधिक सहायक सन्तकुमारी खनालले बताउनुभयो । चौधरीले करिब २० लागको लागतमा फार्म बनाउने योजना रहेको बताउनुभयो । वार्षिक एक अर्ब माछाका भुरा उत्पादन गर्ने योजना उहाँको छ ।
उहाँले अहिले माछाका भुरा उत्पादन गर्ने १८ क्विन्टल माउ रहेको समेत बताउनुभयो । यसअघि उहाँले जिल्लाबाट ह्याच गरेर ल्याएको माछाका भुरा पालेर बिक्री गर्दै आउनुभएको थियो । चितवनमा पछिल्ला वर्षहरूमा माछा पाल्ने कृषकको सङ्ख्या बढ्न थालेपछि नेपाल सरकारले समेत आवश्यक अनुदान दिएर माछापालनका लागि क्षेत्र विस्तारको कार्यक्रम सुरु गरेको छ ।
चितवनमा यो वर्ष माछापालनका लागि ४० हेक्टर क्षेत्रफल विस्तार गरिएको कार्यालयले जनाएको छ । यो वर्ष रु ४० लाख बजेट क्षेत्र विस्तारका लागि जिल्लामा आएको छ । यहाँको पिप्ले, माडीका विभिन्न गाविस, कुमरोज, रत्ननगर, दिव्यनगर, पटिहानीलगायत गाविसमा यो वर्ष क्षेत्र विस्तार गरिएको छ ।
जिल्लामा अहिले करिब ३०० हेक्टरमा माछापालन भइरहेको छ । जिल्लामा जिउँदो माछाको खुद्रा बिक्रीसमेत सुरु भएको छ । रासस
Discussion about this post