चितवनमै दुर्लभ शल्यक्रिया

चिकित्सा विज्ञानमा दुर्लभ र जटिल मानिने छुट्टिएका अङ्ग पुनः जडान गरिने शल्यक्रिया चितवनमा नै सम्भव भएको छ । नारायणगढस्थित एक फर्निचरमा काठ काट्ने मेसिन चलाउने क्रममा भरतपुर–२ क्षेत्रपुरका मोहन थापाको शरीरबाट पूर्ण रुपमा छिनेको बायाँ हात शल्यक्रियापश्चात् पुनः जोडिएको छ । छुट्टिएका अङ्ग पुनः जोडिने शल्यक्रिया सफल भएको उपत्यकाबाहिर नै सम्भवत पहिलो मानिएको छ । चितवन मेडिकल कलेज (सिएमसी)मा शुक्रबार चिकित्सकहरुको टोलीले चार घन्टाको लामो शल्यक्रियाबाट थापाको हात जोडेको थियो । त्रिवि शिक्षण अस्पतालमा एक दशकअघि नेपालमा पहिलो पटक प्लास्टिक सर्जन डा. ईश्वर लोहनीको टोलीले यस्तै प्रकृतिको शल्यक्रिया गरेको थियो । डा. लोहनीको नेतृत्वमा दुवै हात जोड्नेसहित आधा दर्जन जटिल शल्यक्रिया भने सफल भइसकेको छ ।
चिकित्सकहरुका अनुसार शरीरको कुनै पनि अङ्ग छुट्टिएको ६ घन्टाभित्र अस्पताल पु¥याए अरु असामान्य जटिलता नभएमा जोड्न सकिन्छ । त्यसका लागि छुट्टिएको अङ्गलाई नभिज्ने गरी बरफमा राखेर जोगाउनुपर्छ । सूक्ष्म शल्यक्रियाबाट गरिने यस्तो जटिल शल्यक्रिया सफलताका लागि सर्जरीबाहेक अन्य धेरै कुरामा भर पर्ने सर्जनहरुको भनाइ छ । इमर्जेन्सी उपचार एनेस्थेसियाको चुस्त व्यवस्था र चुस्त नर्सिङ सेवाबिना यस्तो सर्जरी सफल हुन नसक्ने बताइएको छ । त्रिवि शिक्षण अस्पतालमा पहिलो पटक ११ वर्षअघि एउटा हात शल्यक्रियाबाट जोडिएको थियो । यस्तै तीन वर्षअघि चुँडिएका दुवै हातको सफल शल्यक्रिया भएको थियो । काटिएर छुट्टिएको अङ्ग जोडिएर सुधार आएपछि लामो समय फिजियोथेरापी आवश्यक पर्ने र त्यसपछि पुरानै अवस्थामा जोडिएका अङ्गले काम गर्न सक्ने चिकित्सकहरुले बताएका छन् ।
चिकित्सा विज्ञानमा दुर्लभ र जटिल मानिने शल्यक्रिया चितवनमा नै सम्भव हुनु सबै चितवनवासीका लागि हर्षको विषय हो । यसअघि चितवनमा छिनेको हात जोड्न सम्भव नहुने भन्दै चिकित्सकहरुले त्रिवि शिक्षण अस्पताल लैजान रिफर गर्दै आएका थिए । शिक्षण अस्पतालपछि चितवन मेडिकल कलेजमा अर्थोपेडिक सर्जन डा. सुरेश पाण्डेसहितको टोलीले हात छिनेर अस्पताल पु¥याएको डेढ घन्टापछि थापाको तत्काल शल्यक्रिया थालेको थियो । टोलीमा प्लाष्टिक सर्जन डा. बुद्धिराज अधिकारी, अर्थोपेडिक्स सर्जन डा. ज्योति श्रेष्ठ, एनेस्थेसिया डा. गोपेन्द्रप्रसाद देव, डा. भारती शर्मा र डा. सुरेन्द्र न्यौपाने सरिक थिए । सफल शल्यक्रियापछि थापा सिएमसी शिक्षण अस्पतालको आइसीयुमा स्वास्थ्य लाभ गरिरहेका छन् । राजधानी बाहिर यस्तो प्रकृतिको जटिल शल्यक्रिया सम्पन्न भएकोमा सर्वसाधारणहरुमा खुसीको सञ्चार गराएको छ । यस्तो दुर्लभ र जटिल शल्यक्रिया सम्पन्न भएपछि चितवनलाई मेडिकल सिटीको अवधारणामा थप सहयोग पुग्ने अपेक्षा गरिएको छ ।