फोहोर उठाएबापत् सेवा कर

भरतपुर । चितवनको भरतपुर नगरपालिकाले फोहर उठाएबापत सेवाकर उठाउन थालेको छ ।
यसअघि नगरपालिकाले बस्तु करमात्रै लिँदै आएको थियो । अहिले सेवाकरका लागि ठेक्का दिइएको नगरपालिकाका वातावरण शाखाकी सरसफाइ सहायक जानुका केसीले बताउनुभयो ।
यो वर्षदेखि सुरू भएको सेवाकरबाट २५ लाख रकम उठेको उहाँले बताउनुभयो । व्यवसायी श्यामकृष्ण श्रेष्ठलाई मासिक चार लाख दिने गरी यहाँको फोहर उठाउने जिम्मा नगरपालिकाले दिएको छ ।
उनीहरुले सेवाकरमार्फत आएको रकमको १० प्रतिशत पनि पाउने प्रावधान छ । उठेको रकमको ३० प्रतिशत सम्बन्धित टोलमा खर्च गरिने र बाँकी ६० प्रतिशत रकम भने नगरपालिकामा जाने केसीले बताउनुभयो । यता नगरवासीले भने फोहर नियमित नउठ्ने गरेको गुनासो गरेका छन् । भरतपुरमा दैनिक ४६ टन फोहोर निस्कन्छ । त्यसमध्ये नगरपालिकाले २५ टन फोहोरको व्यवस्थापन गर्दै आएको छ ।