थप दुई आरोपी पक्राउ

    कृष्ण अधिकारी हत्या प्रकरण
भरतपुर । छोराको हत्यारालाई कारबाही हुनुपर्ने माग राखेर अनसनमा बसेका गोरखा फुजेलका गंगामाया र नन्दप्रसाद अधिकारीको स्वास्थ्य अवस्था नाजुक हुँदै गएपछि आरोपी समाउन चितवन प्रहरी फेरि सक्रिय भएको छ । चितवन प्रहरीले आरोपीमध्येका थप दुईजनालाई समाएको छ । अधिकारी दम्पतीका छोरा कृष्णप्रसादको विस २०६१ साल जेठ २४ मा चितवनमा हत्या भएको थियो ।
हत्याको जिम्मा तत्कालीन विद्रोही पक्ष माओवादीले लिएको थियो । सुराकीको आरोपमा हत्या गरेको माओवादीको भनाइ थियो । अधिकारी कुनै सुराकी नभएको भन्दै उनका आफन्तले ११ जना विरूद्ध चितवन प्रहरीमा किटानी जाहेरी दिएका थिए । त्यसमध्ये दुईजना आरोपी यसअघि समातिएका थिए । तर मुद्दा चलाउन प्रमाण नपुग्ने भन्दै उनीहरु हाजिरी जमानीमा छुटेका थिए ।
आरोपित ११ जनामध्ये अधिकारी हत्यामा थप तीनजना पनि संलग्न भएको चितवन प्रहरीको अनुसन्धानले देखाएको थियो । थप अन्य तीनजना कोही नसमातिए पनि चितवन प्रहरीले ११ जनामध्येका थप दुईजनालाई पक्राउ गरेको छ । मानव अधिकारवादीहरुले यो प्रकरणमा राष्ट्र संघको ध्यानाकर्षण समेत गराएका छन् ।
कृष्णका बाबुआमाले पछिल्लो पटक अनसन सुरू गरेको शुक्रबार १४७ औं दिन भएको छ । प्रहरीले आरोपित छविलाल पौडेल र भीमसेन पौडेललाई बिहीबार मध्यरातमा समाएको हो । छविलाललाई काठमाडौं मनमैजु र भीमसेनलाई उनकै घर चितवन रत्ननगर जिरौनाबाट समाएको चितवन प्रहरीका एसपी प्रद्युम्न कार्कीले जनाए ।
गोरखाका कृष्ण अधिकारीको विस २०६१ जेठ २४ मा चितवन रत्ननगरमा पहिला अपहरण र त्यसपछि हत्या भएको थियो । अधिकारीलाई अपहरण गरेर लैजाने र गोलीसमेत हानेर ज्यान लिने तीनजना व्यक्ति किटानी जाहेरीमा नाम परेका ११ जनाभन्दा बाहिरका रहेको अनुसन्धानले देखाएको थियो । जाहेरीमा नाम परेकाहरुको पनि अनुसन्धान गर्ने र अरुलाई पनि समाउने प्रहरीको योजना छ ।
घटनामा संलग्न भनेर प्रहरीले पहिचान गरेका तीनमध्ये दुईजनाको मृत्यु भइ सकेका छन् भने एकजना विदेशमा रहेकाले इन्टरपोलको सहयोगमा समाउने प्रहरीको तयारी छ । उनीहरु तीनजना नै माओवादी कार्यकर्ता रहेको एसपी कार्कीले जानकारी दिए । तीनजनामध्ये चितवन रत्ननगरका रूद्र आचार्यमात्रै जिवित छन् । उनी विदेशमा छन् ।
पहिचान भएका अरू दुईमध्ये ऋषिराम लामिछाने विसं. २०६२ साल माघ १८ मा र मदन पौडेल २०६२ साल माघ २७ मा सुरक्षा कारबाहीमा मारिएको चितवनका एसपी कार्कीले जानकारी दिए । घटनाको गम्भीर ढंगले अनुसन्धान भइरहेको र आरोपितहरु समाएर कानुनी कठघरामा उभ्याउने काममा प्रहरी दत्तचित्त भएर लागेकाले अधिकारी दम्पतीलाई अनसन स्थगित गर्न कार्कीले अपिल गरेका छन् ।
प्रहरीले यसअघि आरोपी ११ जनामध्ये रामप्रसाद अधिकारी र पर्शुराम पौडेललाई समाएको थियो । अनुसन्धानपछि मुद्दा चलाउन सरकारी वकिलको जिम्मा लगाए पनि प्रमाण नपुग्ने भन्दै सरकारी वकिलले मुद्दा नै दायर नगरेर हाजिरी जमानीमा छाड्न निर्देशन दिएपछि दुवैजना छुटेका थिए ।