जितको श्रृंखला जारी रहोस्

बंगलादेशमा जारी आईसीसी ट्वान्टी–२० विश्वकप क्रिकेटमा नेपाली क्रिकेट टोलीले हङकङविरूद्ध ८० रनको फराकिलो जित हासिल गरेको छ । रङ्गको पर्व होली थप रङ्गीन बनेको छ । नेपालले ट्वान्टी–२० विश्वकप क्रिकेटको पहिलो खेलमा उत्कृष्ट प्रदर्शन गर्दै विजयी सुरूवात गरेपछि देशभर उमङ्ग र खुसीयाली छाएको छ । क्रिकेटका लाखौँ फ्यानहरुले देशभर हर्षोल्लासका साथ विजय उत्सव मनाइरहेका छन् । यो जितसँगै नेपाली क्रिकेट टोलीको विश्वकपमा उपस्थिति जनाउने सपना पनि साकार भएको छ । आइतबार स्पिन आक्रमणमा उत्रिएको नेपालले हङकङविरूद्ध रवाफिलो जित त हासिल ग¥यो नै, नेपालका तर्फबाट वसन्त रेग्मी र शक्ति गौचनले तीन–तीन विकेट लिन सफल पनि भए । विश्वकपको यो शानदार जितले सम्पूर्ण नेपालीको शिर उँचो हुनुका साथै नेपाललाई विश्वसामु चिनाउन ठूलो योगदान गरेको छ ।
नेपालले हङकङसामु १ सय ५० रनको लक्ष्य प्रस्तुत गरेको थियो, जसमा हङकङ ६९ रनमै अलआउट भएको थियो । कप्तान पारस खड्काले पहिलो बलमै हङकङका खेलाडीलाई आउट गरेपछि हङकङको पतन सुरू भएको थियो । नेपाली खेलाडीले देखाएको शक्तिशाली प्रदर्शनपछि हङकङका कप्तान जेमी एट्किन्सनले नेपाली खेलाडीहरुको खुलेर प्रशंसा गरेका थिए । उनले नेपाली खेलाडीहरुले आधारभूत तहदेखि नै राम्रो खेल प्रदर्शन गरेर हङकङलाई निराश बनाएको प्रतिक्रिया दिएका थिए । कप्तान जेमीलाई सोमपाल कामीले बोल्ड आउट गरेपछि झनै हङकङको टोली निराश बनेको थियो । उत्कृष्ट बलिङका कारण नेपालले विजयी सुरूवात गरेको हो । बंगलादेशमा नेपाली समर्थकहरुले देखाएको साथ र समर्थनले खेलाडीहरुको थप आत्मविश्वास बढेको थियो । यही लयलाई पछ्याउँदै नेपालले जित हासिल गर्ने अपेक्षा नेपाली क्रिकेटका लाखौँ फ्यानहरुले राखेका छन् ।
पहिलो पटक विश्वकपमा होमिएको नेपालले आज मंगलबार दोस्रो खेलअन्तर्गत बंगलादेशविरूद्ध चर्को प्रतिस्पर्धा गर्नुपर्ने छ । बंगलादेशको चटगाउँस्थित जोहर अहमद चौधरी खेल मैदानमा हुने खेलमा नेपालले शानदार प्रदर्शन जारी राख्नुपर्ने छ । आयोजक राष्ट्र बंगलादेशले समूह ए अन्तर्गत मिरपुरस्थित श्रीबंगला नेसनल स्टेडियममा अफगानिस्तानलाई नौ विकेटले हराएर सुखद सुरूवात गरिसकेको छ । उसले अफगानिस्तानलाई ७३ रनको लक्ष्य भेट्टाउन १२ ओभरमा एक विकेट मात्रको क्षतिमा ६८ रन जोडेको थियो । उसो त, हङकङभन्दा बलियो मानिएको आयोजक क्रिकेट टोलीलाई घरेलु मैदानमा अपेक्षाकृत समर्थकहरुको उत्साह रहने छ । विपक्षी टोलीलाई हायलकायल बनाउन खप्पिस नेपाली खेलाडीका लागि यो खेल मैदान पनि घरेलु मैदानजस्तै सहज बन्ने आशा गरिएको छ । बंगलादेशमा हजारौँ नेपाली दर्शकहरुको हौसलासहित उत्साही नेपाली क्रिकेट टोलीले जितको श्रृंखला जारी राख्ने विश्वास गरिएको छ ।