टाँडी कुरूप बनेको देख्दैन नगरपालिका

रत्ननगर । रत्ननगरको टाँडी बजार क्षेत्र कुरूप बन्दै गएको भन्दै सरोकारवालाहरुले चिन्ता व्यक्त गरेका छन् ।
चार महिनामा नगरपालिकाले गरेका कामहरुको बारेमा नगरबासीलाई जानकारी गराउन बिहीबार आयोजना गरिएको सार्वजनिक सुनुवाइमा उनीहरुले टाँडी बजार व्यवस्थित गर्न नगरपालिका चुकेको आरोप लगाएका छन् । बजार व्यवस्थित पार्न नगरपालिकाले तदारूकता नदेखाएको भन्दै उनीहरुले पार्किङको व्यवस्थापन र ढल निर्माणलाई छिटो सकेर बजार व्यवस्थित गर्न मागसमेत गरेका छन् ।
‘टाँडी बजार कुरूप भएर हेर्नै नहुने भएको नगरपालिकाले देखेन’ एक सहभागीले भने, ‘कहाँ जान्छ नगरपालिकाको ध्यान अचम्म छ बा !’ यसो भन्दा नगरपालिकाका पदाधिकारीहरु मौन नै रहे ।
कार्यक्रममा सहभागीहरुले बजार व्यवस्थापन, ढल निर्माण, सडक मर्मत, फोहोर व्यवस्थापन, खानेपानीको विस्तारलगायतको विषयहरुमा बजेट विनियोजन गरी काम गर्न आग्रहसमेत गरेका छन् ।
कार्यक्रममा टोल विकास संस्था वडा नम्बर १२ का वडा संयोजक पूर्ण पुरी, वडा नम्बर ५ का संयोजक शिवप्रसाद आचार्य, पञ्चकन्या सामुदायिक वनका अध्यक्ष रामबाबु श्रेष्ठ, सामुदायिक सेवा केन्द्रका सदस्य रामचन्द्र पौडेल, विद्यार्थीहरु सविना परियार, रविना खातुन, स्थानीय विपिन शर्मा आचार्य, कृष्णप्रसाद दुवाडीलगायतले विकास निर्माण र सुशासनका बारेमा जिज्ञासा राखेका थिए ।
नगरपालिकाका कार्यकारी अधिकृत सहदेवप्रसाद श्रेष्ठ, लेखा शाखा प्रमुख सीताराम पोखरेल, योजना शाखा प्रमुख प्रकाशचन्द्र ढुंगानाले नगरवासीले राखेको जिज्ञासा मेटाउनुभएको थियो ।
कार्यक्रममा नगरपालिकाकी उर्मिला दाहालले कार्यक्रमको उद्देश्य र सामुदायिक विकास शाखा प्रमुख तोरणराज पौडेलले नगरपालिकाले प्रदान गर्ने सेवाका बारेमा जानकारी गराउनु भएको थियो । कार्यक्रम कार्यकारी अधिकृत सहदेवप्रसाद श्रेष्ठको अध्यक्षतामा सम्पन्न भएको हो ।