ग्रामीण क्षेत्रमा बढी एचआईभी संक्रमित

शक्तिखोर । असुरक्षित यौन व्यवहार र जनचेतनाको कमीले एचआईभी रोगको संक्रमण फैलिएको शक्तिखोरमा आयोजित कार्यक्रममा बोल्ने वक्ताहरुले बताएका छन् ।
ग्रामीण स्तरमा जनचेतनाको कमी भएको र असुरक्षित यौन व्यवहारले नै ग्रामीण स्तरमा बढी एचआईभी संक्रमित रहेको कार्यक्रममा जानकारी दिइएको थियो ।
महिला शसक्तिकरण तथा परिवर्तनशील संस्था नेपालले शक्तिखोरमा आयोजना गरिएको एचआईभी एड्ससम्बन्धी सचेतना प्रशिक्षण कार्यक्रममा बोल्ने वक्ताहरुले सो कुरा बताएका हुन् । संस्थाले ग्रामीण स्तरका मानिसहरुमा शैक्षिक चेतना कम भएकाले एचआईभी एड्स सम्बन्धी जनचेतना फैलाउन कार्यक्रमको आयोजना गरेको जनाएको छ ।
संक्रमितले समाजमा खुलेर बाँच्न तथा रोगको बारेमा जनचेतना फैलाउने उद्देश्यले कार्यक्रमको आयोजना गरिएको महिला सशक्तीकरण तथा परिवर्तनशील संस्था नेपालकी अध्यक्ष संगीता भट्टराईले बताउनुभयो । स्थानीय विकास अधिकारी तिलक पौडेलले एचआईभी एड्स अन्य रोगजस्तै भएपनि यो रोग लागेपछि समाजमा हेर्ने दृष्टिकोण फरक भएका कारण संक्रमितहरु खुल्न नचाहेको बताउनुभयो ।
समाजले संक्रमितलाई हेर्ने दृष्टिकोण परिवर्तन गर्न आवश्यक रहेको बताउँदै उनीहरुलाई समाजले पनि अन्य मानिससरह व्यवहार गर्नुपर्नेमा जोड दिनुभएको छ ।
जिल्ला विकास समिति चितवनका योजना अधिकृत पुरुषोत्तम शर्मा, जिल्ला एड्स समन्वय समितिका संयोजक रामहरि न्यौपानेलगायतले मन्तव्य राख्नुभएको कार्यक्रममा एड्स हेल्थ फाउन्डेसनका कार्यक्रम संयोजक कृष्णहरि सापकोटा, छहारी महिला समूहकी उपाध्यक्ष मनु तामाङ, नसिंग विएन सुवेक्षा शर्माले तालिम दिनुभएको थियो ।