प्रेस युनियनको बधाई

भरतपुर । नेपाल पत्रकार महासंघ चितवनको १० औ अधिवेशनबाट निर्वाचित भएकालाई नेपाल प्रेस युनियन चितवनले बधाई तथा सम्मान गरेको छ । युनियन चितवनका अध्यक्ष नारायण अधिकारीले निर्वाचन पछाडिको परिणाम सबैको जितका रुपमा लिनुपर्ने बताउनुभयो ।
कार्यक्रममा युनियनका मध्माञ्चल संयोजक दीपक आचार्यले श्रमजीवी पत्रकार ऐनको बहस लामो समयदेखि चलेको भएपनि आन्दोलन फितलो भएको बताउँदै ऐन कार्यान्वयन गराउन नयाँ कार्यसमितिको ध्यानाकर्षण गराउनुभयो ।
नेपाल पत्रकार महासंघ चितवनका नवनिर्वाचित अध्यक्ष हरिप्रसाद पोख्रेलले सबैको साझा पत्रकार बन्ने प्रतिबद्धता व्यक्त गर्नुभयो । त्यस्तै युनियनका सल्लाहकार दिनेश थपलियाले महासंघमा सदस्यता शुद्धीकरणको अभियान थाल्न नवनिर्वाचित कार्यसमितिलाई सुझाव दिनुभयो । कार्यक्रममा नेपाल पत्रकार महासंघ चितवनका अध्यक्ष कृष्ण गिरीले अधिवेशनमा सबैको जित भएको भन्दै महासंघलाई पत्रकारको छाता संगठनको रुपमा अघि बढाउन सुझाव दिनुभयो ।
कार्यक्रममा चितवन गैँडाकोट रेडियो प्रसारक संघका अध्यक्ष भोजराज कौडाल, क्रान्तिकारी पत्रकार महासंघ चितवनका अध्यक्ष नवराज ढकाल, स्वतन्त्र पत्रकार संघ चितवनका अध्यक्ष सूर्यप्रकाश कँडेल, प्रेस चौतारीका सचिव तीर्थ नेपाललगायतले बोल्नुभयो ।