महिला हिंसा अन्त्य गरौँ

हरेक वर्ष मार्च ८ मा नारीमाथि हुने विभेद, अन्याय र शोषण अन्त्यका लागि अन्तर्राष्ट्रिय नारी दिवस मनाइने गरिन्छ । यस वर्ष पनि देशभर महिलाविरूद्ध थुप्रै अभियान सञ्चालन गरी नारीवादी संघसंस्थाहरुले यो दिवस मनाएका छन् । तर, नारी दिवसको सन्दर्भमा जति नै आवाज उठाइने गरे पनि खासै औचित्यपूर्ण हुन सकेको पाइएको छैन । नारी दिवसकै दिन सप्तरीमा मुस्लिम समुदायकी नजराना खातुन घरभित्रै रहस्यमय ढंगले जलेको अवस्थामा फेला परिन् । विश्वभर नारी दिवस धुमधामले मनाइरहँदा भारत बिहारबाट मोरङमा जन्ती लिएर आएका बेहुला रामकुमार दासले ससुरालीले सुनको औँठी नदिएको भन्दै बेहुली जन्माएर लैजान अस्वीकार गरे । यी दुई महिला हिंसाका प्रतिबिम्बित घटनामात्र हुन् । देशभर विभिन्न घटनाहरु समाचारै नबनी पुरानो भइरहेका छन् ।
नारी दिवस सबै श्रमजीवी महिलाको महान् पर्व हो । यो दिवसमा विभिन्न महिलावादी संघसंस्थाले महिला हिंसाविरूद्ध अभियान चलाएर समतामूलक समाज निर्माणका लागि पहलकदमी गरेका छन् । उसो त, नारी दिवस मनाउन थालिएको एक शताब्दीभन्दा बढी भइसकेको छ । महिलाको आवाज, संघर्ष र स्वाभिमानको सन्देश बोकेको यो दिवस मनाउन थालिएको नै १०३ वर्ष पुगिसके पनि लैंगिक विभेदविरूद्ध औचित्यपूर्ण प्रगति हुन सकेको छैन । हरेक दिन अखबारहरुमा दाइजोका नाममा, कथित बोक्सीको आरोपमा, छोरा नपाएको निहुँमा महिला हिंसाका घटनाहरु बढिरहेका छन् । समाजमा साक्षरता प्रतिशत बढ्दै गए पनि परिवारमा हुने यस्ता घटनाहरुका कारण महिला असुरक्षित बन्दै गइरहेका छन् । आर्थिक रुपमा विपन्न महिलामात्र होइन, शिक्षित र सम्पन्न परिवारभित्र पनि महिलाहरु पीडित बनिरहेका छन् । विभिन्न नारी अधिकारकर्मीहरुले परिवारभित्रैबाट हुने यस्ता हिंसा बढी खतरनाक रहेको विश्लेषण गरेका छन् ।
पछिल्ला वर्षहरुमा महिला हिंसाविरूद्धको अभियानबाट सामाजिक कुसंस्कार, कुरीति, बालविवाह, बहुविवाह आदि विषयमा महिला स्वयं सचेत हुन थालेका छन् । समाजमा हुने लैंगिक एवम् घरेलु हिंसाका कारण महिलाले परिवर्तनको अनुभूति गर्न नसकिरहेको अवस्था छ । महिलामाथि हुने हिंसाविरूद्ध कानुन बने पनि कार्यान्वयन पक्ष फितलो भएका कारण हिंसा तथा विभेदमा कमी आउन सकेको छैन । अझै पनि लैंगिक हिंसामा परेकामध्ये ६१ प्रतिशत महिलाले घटना लुकाउने गरेको पाइएको छ । देशमा ४८ प्रतिशत महिला लंैगिक हिंसापीडित रहेको प्रधानमन्त्री कार्यालयको प्रतिवेदनमा उल्लेख छ । ओरेक नेपालको प्रतिवेदनमा ८० प्रतिशत विवाहित महिला हिंसापीडित छन्, जसमध्ये ९० प्रतिशत आफ्नै घरपरिवार तथा आफन्तबाटै पीडित भएका छन् । प्रत्येक दिन एउटा महिला बलात्कारको सिकार भइरहेका छन् । महिला हिंसामा पुरूष नै बढी जिम्मेवार भए पनि कतिपय हिंसामा महिला नै दोषी पाइएका छन् । सरकारले महिला हिंसाविरूद्ध कडा कानुन निर्माण गरी कार्यान्वयन गर्न सके महिला हिंसा अन्त्य हुने अपेक्षा गर्न सकिन्छ ।