रत्ननगर । रत्ननगर नगरपालिका वडा नं १२ मा सामूहिक कागतीखेतीसम्बन्धी किसानहरुसँग छलफल गरिएको छ । फलफूल तथा तरकारी मूल्य श्रृङ्खला विकास आयोजनाअन्तर्गत वडा नं १२ मा सामूहिक कागतीखेती गर्ने योजनाबमोजिम किसानहरुसँग छलफल गरिएको हो ।
साना किसानहरुको जीवनस्तर उकास्न रत्ननगर नगरपालिकाले किसानहरुको समूह बनाएर कागतीखेती सुरू गर्न लागेको वडाध्यक्ष वीरबहादुर पाख्रिनले जानकारी दिए । सामूहिक कागतीखेतीको बारेमा मंगलवार वडा कार्यालयमा समूह छलफल गरिएको छ । १५ देखि ३० जनाको समूह बनाएर कागतीखेती सुरू गर्ने योजना रहेको उनले बताए । कागतीखेतीका लागि आयोजनाले किसानलाई तालिम, बीउलगायत अन्य प्राविधिक सहयोग गर्नेछ ।
नगरपालिकाका कृषि विकास अधिकृत प्रविन लामाले आयोजनाले गर्ने कामका बारेमा सहजीकरण गरेका थिए । कार्यक्रममा कार्यपालिका सदस्य निर्मला खड्का, वडा सदस्य सुकमाया विक, ठूलाकान्छा तामाङ, पशु विकास शाखा प्रमुख शालिग्राम पौडेललगायतले मन्तव्य राखेका थिए ।
कार्यक्रम वडाध्यक्ष वीरबहादुर पाख्रिनको अध्यक्षतामा भएको थियो । कृषि क्षेत्रको विकासका लागि रत्ननगरमा फलफूल तथा तरकारी मूल्य श्रृङ्खला विकास आयोजनाले काम सुरू गरेको छ ।
