भरतपुर । टक गुरूङ पेसाले इन्जिनियर हुन् । तर, उनी साहित्य लेखनमा पनि उत्तिकै सक्रिय छन् । त्यसैको प्रतिफलस्वरुप मंगलबार चितवनका साहित्यानुरागीहरुले टक गुरूङलाई गजलकारको रुपमा सुन्ने मौका पाए ।
गजलकार माया घोताने गुरूङले उनकै गजलबाट स्वागत गरेर सुरू भएको कार्यक्रममा ‘अनाहत’ गजलसंग्रहभित्र र बाहिरका गरी टकले करिब दर्जन गजल सुनाए ।
गजलको शुभचिन्तक भएकै कारण चितवनले विश्वास गरेर नेपालमै पहिलोपटक मञ्च दिएको बताउँदै उनले सामाजिक परिवेश, माया, प्रेम, पीडा आदि मिसिएका गजल सुनाए । कुनै वाचन र कुनै तरन्नुममा स्वरबद्ध गर्ने प्रयास गरे ।
कार्यक्रममा चितवनका पुराना तथा युवा गजलकारहरुको समेत उपस्थिति थियो । यही क्रममा गजल मञ्च चितवनका पूर्वअध्यक्ष एवम् हाम्रो मझेरी साहित्य प्रतिष्ठानका अध्यक्ष पुष्प अधिकारी (अञ्जलि)ले गजलकार गुरूङको व्यक्तित्व–चित्रसँगै साहित्य लेखनबारे प्रकाश पारेका थिए ।
उनले गजलकार गुरूङलाई नेपाली गजलमा फरक शैली अपनाउने गजलकारका रुपमा चित्रण गरे । सम्पूर्ण किताब नारायणगढ र बुलबुल प्रकाशनको संयुक्त आयोजनामा कार्यक्रम भएको थियो ।
