नवलपरासी । जिल्ला अदालत नवलपुरमा सबैभन्दा बढी सम्बन्धविच्छेदका मुद्दा पर्ने गरेको छ । यस आर्थिक वर्षको पछिल्लो चार महिनामा जिल्ला अदालत नवलपुरमा परेका ४०९ वटा मुद्दामध्ये एक सयवटा मुद्दा सम्बन्धविच्छेदको परेको छ । यो तथ्याङ्क २०७६ साल साउन १ गतेदेखि मंसिर १२ गतेसम्मको हो ।
एक सय सम्बन्धविच्छेदका मुद्दामा ६५ वटा मुद्दा पुरूषको तर्फबाट दर्ता भएका जिल्ला अदालत नवलपुरका सूचना अधिकारी दुर्गाबहादुर कार्कीले बताए । कार्कीका अनुसार ३५ जना महिलाले सम्बन्धविच्छेदका लागि निवेदन दिएका छन् । एक सयवटा मुद्दामा एउटा मुद्दा मिलापत्र भएको छ । जिल्ला अदालत नवलपुरमा मेलमिलापकर्तासमेत रहेका कार्कीका अनुसार अदालतमा सम्बन्धविच्छेदका मुद्दा आएसँगै मेलमिलापकर्ताबाट छलफल गराएर मेलमिलाप गराउन खोजे पनि अधिकांशले सम्बन्धविच्छेद नै गर्ने गर्दछन् ।
त्यस्तै, अघिल्लो आर्थिक वर्षको माघ १७ गतेदेखि असार ३१ गतेसम्मको जिल्ला अदालत नवलपुरको तथ्याङ्क हेर्ने हो भने पनि ५१४ वटा मुद्दा दर्ता भएकोमध्ये ८३ वटा मुद्दा सम्बन्धविच्छेदका रहेका छन् । तीमध्ये ४६ वटा सम्बन्धविच्छेदका मुद्दा पुरूषको तर्फबाट दर्ता भएको छ भने ३६ वटा मुद्दा महिलाको तर्फबाट दर्ता भएका छन् ।
सरकारी जागिरदेखि वैदेशिक रोजगारीसम्म
कावासोतीका एक पुरूष वैदेशिक रोजगारीका लागि विदेश गएको झन्डै १५ वर्ष बढी भइसक्यो । नेपालमा चालकको रुपमा काम गर्दै आएका ती पुरूष विवाहपश्चात् बच्चाबच्ची जन्मिएर ठूला हुन थालेपछि बढ्दै गएको खर्च धान्न विदेश हानिए । विदेशमा उनले भनेजस्तै नोकरी पनि पाए । नेपालमा पनि चालकका रुपमा काम गरेका उनले विदेशमा पनि चालककै रुपमा काम गर्न पाए । महिनामा डेढ÷दुई लाख नेपाली रूपैयाँ उनको कमाइ हुने गर्दथ्यो ।
कमाइ राम्रै भएका कारण धनसम्पत्ति जोड्ने अभिलाषाले ती पुरूष केही दिनका लागि छुट्टी मिलाएर नेपाल आए पनि पुनः विदेश जाने गरे । झन्डै आफ्नो उमेरको डेढ दशक विदेशी भूमिमा श्रम गरेर कमाएको दुई–अढाई करोड नेपाली रूपैयाँ ती पुरूषले सरासर श्रीमतीको नाममा पठाए । श्रीमतीले पनि घरखर्च र अन्य खर्च गरेर केही सम्पत्ति जोडिन्, जुन सम्पत्ति श्रीमतीले सबै आफ्नै नाममा खरिद गरेकी थिइन् ।
जब पुरूष अब नेपालमै केही गर्ने भनेर नेपाल आएर श्रीमतीसँग हिसाबकिताब माग्न थालेपछि आधाआधी रकम अर्थात् श्रीमान्ले पठाएको दुई करोड रूपैयाँमा एक करोड बढी हिसाब देखाउन नसकेपछि श्रीमान्श्रीमतीको बीच फाटो आयो । उनीहरु सम्बन्धविच्छेद गर्ने अवस्थामा पुगे । अहिले कानुनमा पुरूषले पनि सम्बन्धविच्छेदको माग गर्दै निवेदन दर्ता गर्न पाउने प्रावधान आएपछि उनले सम्बन्धविच्छेदका लागि मुद्दा दर्ता गरेका छन् ।
उनीमात्रै नेपालभित्रै सरकारी जागिर गरेका तर घर खासै समय नदिएर बाहिर बाहिर बस्ने गरेका जोडीले पनि सम्बन्धविच्छेद माग्ने गरेका छन् । स्रोतका अनुसार जिल्ला अदालत नवलपुरमा प्रहरी नायब उपरीक्षक तहसम्मका अधिकारीहरु पनि सम्बन्धविच्छेदका घटना दर्ता गराउन आउने गरेका छन् ।
श्रीमान् घरबाहिर हुने, श्रीमती गाउँघरमा हुने । श्रीमान्श्रीमतीबीच नियमित सम्पर्कमा कमी हुँदा एकले अर्कालाई शंका गर्ने र सोही शंकाले ठूलो रुप लिएर सम्बन्धविच्छेदका घटनासम्म पुग्ने गरेको छ । अदालत स्रोतका अनुसार अधिकांश घटना विदेश श्रीमान् भएकाहरुको जोडीले नेपाल फर्किएपछि सम्बन्धविच्छेदका लागि निवेदन दिने गरेका छन् ।
त्यसैगरी, नेपालभित्रै श्रीमान् जागिरे छ र घरपायक जागिर नभएकाहरुको बीच पनि सम्बन्धमा फाटो आई सम्बन्धविच्छेदका मुद्दा हाल्ने गरेका छन् । अधिकारकर्मीहरुका अनुसार वैदेशिक रोजगारीले भिœयाएको रेमिट्यान्ससँगै आएको विकृति रोक्नतर्फ बेलैमा ध्यान नदिए यो अवस्था विकराल बन्दै जाने सम्भावना रहेको छ ।
