जगतपुर । पश्चिम चितवनको जगतपुरमा ६२ बिघा जमिनमा सामूहिक तरकारीखेती थालिएको छ । भरतपुर महानगरपालिका २४ को केरूङ्गा ताजा तरकारी तथा फलफूल उत्पादक सहकारी संस्थामा आबद्ध २५ जना किसानहरु केरूङ्गा सामूहिक तरकारी कृषि फर्म खोलेर सामूहिक उत्पादनमा जुटेका हुन् ।
सहकारीका अध्यक्ष जनकराज पुरीले पहिलेको १२ बिघामा चिचिन्डा, फर्सी, लौकालगायतका तरकारी तयार भएको हुनाले नयाँ जग्गामा १५ दिनभित्रै काउली, खुर्सानी, करेला र बोडी लगाउने तयारी गरेको बताए ।
नयाँ प्लटमा पानी, मल, बीउ, थाँक्रा, विषादी, बिजुली, कामदार आदिका लागि करिब दुई करोड रूपैयाँ खर्च लाग्ने अनुमान रहेको भन्दै उनले थोपा सिंचाइ र ग्रीन हाउस प्रविधि अपनाउँदा प्रतिकठ्ठा करिब सात लाख खर्च हुने जानकारी दिए ।
पश्चिम चितवनलाई तरकारीको पकेट क्षेत्रका रुपमा लिइन्छ । अझ भरतपुर २४ त तरकारी उत्पादनको केन्द्र नै हो, जहाँ केरूङ्गा सहकारी क्रियाशील छ । युवा सहभागितामा देशकै नमुना अर्र्गािनक कृषि फार्म बनाउने काम केरूङ्गा सहकारीले गरिरहेको उनले बताए । सहकारीले तरकारी संकलन र बिक्रीमा बिचौलियाहरुलाई किसान ठग्न नदिने अध्यक्ष ओली बताउँछन् । सहकारी नै प्रत्यक्षरुपमा उपभोक्तासमक्ष पुग्ने हुँदा बिचौलियाको अन्त्य हुने आशा केरूङ्गा सहकारीले राखेको उनले बताए ।
केरूङ्गा ताजा तरकारी सहकारीका संस्थापक अध्यक्षसमेत रहेका भरतपुर महानगरपालिका वडा नम्बर २४ का वडा अध्यक्ष कान्छा मल्लले सामूहिक खेती गर्न प्रतिबिघा वार्षिक ४० हजार रूपैयाँका दरले पाँच वर्षका लागि जग्गा भाडामा लिइएको बताए । १२ बिघामा सामूहिक तरकारीखेती गर्दा सफल भएपछि उत्साही भएर ५० बिघा थपेको मल्लले बताए ।
१०० प्रतिशत अर्र्गािनक तरकारी फलाउने र तरकारी उत्पादनमा केरूङ्गा सहकारीले नयाँ इतिहास रच्ने लक्ष्यसहित आफूहरु यस कार्यमा जुटेको बताए । उनले भने, ‘सरकारको उपेक्षा र बिचौलियाको ज्यादतीका कारण तरकारी उत्पादकहरु विस्थापित हुँदै गएका छन् ।’ सहकारीहरुले सामूहिक तरकारीखेती सुरू गरेपछि बजारको सुनिश्चितता बढ्ने र व्यावसायिक तरकारी उत्पादकहरु थप आकर्षित हुने भन्दै तरकारी उत्पादनमा ७० जनाले प्रत्यक्ष रोजगारी पाउने उनले बताए ।
बसाइँसराइका कारण खेतीयोग्य जमिन बाँझो हुँदै गएपछि त्यसको सही सदुपयोग गरी आर्थिक उपार्जन गर्ने र युवालाई गाउँमै रोजगारी दिने मुख्य उद्देश्यले सामूहिक खेतीको थालनी गर्न लागेको उनले बताए । ‘सहकारीमा आबद्ध सदस्यहरु सक्रिय तवरले निरन्तर काम गर्दै आएका छन्’, उनले भने, ‘समूहमा काम गर्दा ज्ञान र सीपको आदानप्रदान हुने भएकाले पनि यो अभियान प्रभावकारी हुनेछ ।’
कृषि उत्पादन बढाउनु नै महानगरको पहिलो प्राथमिकता रहेको बताउँदै वडाध्यक्ष मल्लले महानगरले २० प्रतिशत रकम कृषि क्षेत्रमा विनियोजन गरेको र वडाबाट पनि त्यही अनुपातमा रकम कृषि उत्पादनका निम्ति विनियोजन गरिएको बताए । सहकारीहरुले सामूहिक तरकारीखेती सुरू गरेर तरकारी उत्पादनमा जोडिएपछि बजारको सुनिश्चितता बढ्ने अनि व्यावसायिक तरकारी उत्पादकहरु थप आकर्षित हुने उनको भनाइ छ ।
