हेटौँडा । मकवानपुरको पश्चिमी तीन गाउँपालिकाको करिब ३० हजार मानिस हिँड्ने बाटोमा पर्छ, परेवा भीर । मनहरी गाउँपालिका हुँदै राक्सिराङ गाउँपालिका र कैलाश गाउँपालिकाको बाटोको अधिकांश स्थान मनहरी खोलाको किनार पर्छ, त्यही किनारमा पर्ने परेवा भीर स्थानीयका लागि सधैँको पीर बन्ने गरेको छ ।
बर्सादको समयमा खोला तर्न नसक्दा चट्टानी पहाड रहेको परेवा भीर पार गर्दा लडेर र बाढीले बगाएर बर्सेनि स्थानीयको ज्यान जाने गरेको कैलाश गाउँपालिकाका अध्यक्ष टंक मोक्तानले जानकारी दिए । स्थानीयले परेवा भीरलाई ज्यानमारा भीरका रुपमा चिन्न थालेको उनले बताए । उनका अनुसार यही बर्सादमा मात्र परेवा भीर पार गर्न नसक्दा २ जनाको मृत्यु भएको छ । राक्सिराङ गाउँपालिकाका अध्यक्ष राजकुमार मल्लका अनुसार परेवा भीरको कारण एक दशकको बीचमा एक दर्जन बढी स्थानीयको ज्यान गइसकेको छ ।
मनहरी खोलामा पर्ने परेवा भीर स्थानीयका लागि हैरानीको विषय बनेको छ । स्थानीयहरुको नियमित दबाबपछि यो आर्थिक वर्षमा करिब डेढ करोड बजेट पर्ने भएको राक्सिराङ गाउँपालिका अध्यक्ष मल्लले जानकारी दिए । परेवा भीरमा बाटो निर्माणका लागि यो वर्ष प्रतिनिधिसभा सदस्य विरोध खतिवडा, प्रदेशसभा सदस्य इन्द्र बानियाँ र राक्सिराङ गाउँपालिकाले गरी डेढ करोड रूपैयाँ बजेट विनियोजन गरेको छ ।
दिगो विकास हुन सकेन
मनहरी गाउँपालिकाबाट कैलाश र राक्सिराङ गाउँपालिकाका विकट गाउँ जोड्न चार दशक लगाएर मनहरी–प्याङ्चे सडक निर्माण गरिएको थियो । स्थानीय तह गठनसँगै निर्माण सम्पन्न भएको यो सडकको दर्जन बढी ठाउँमा २०७६ को बर्सादमा पहिरो गएको छ । उक्त सडक निर्माणमा हालसम्म १० करोड रूपैयाँ बढी खर्च भइसकेता पनि दिगोरुपमा सञ्चालन हुने गरी सडक भने बन्न नसकेको स्थानीयले बताएका छन् ।
स्थानीयहरुले बर्सेनि बजेट विनियोजनको साटो बहुवर्षीय योजनाबाट सडक निर्माण गरिनुपर्ने बताउँदै आएको कैलाश गाउँपालिका अध्यक्ष टंक मोक्तान बताउँछन् ।
यस्तै, त्रिभुवन राजपथअन्तर्गत चुनियाँबाट कालिकाटार हुँदै खैराङ पुगेको मोटरबाटो निर्माण थालेको पनि २४ वर्ष बढी भएको छ । यो सडक निर्माण सुरू गर्ने धेरै मजदुरको मृत्यु भइसकेको छ । तर, अझै पनि हिउँदको समयमा मात्र कालिकाटारसम्म बस सञ्चालन हुने गरेको छ । बर्सादमा यो सडक सञ्चालन हुँदैन ।
यो सडक निर्माणमा पनि केन्द्र, प्रदेश र स्थानीय तहको सरकारले २० करोडभन्दा बढी खर्च गरिसकेका छन् । कैलाश गाउँपालिकाका स्थानीयवासी कमल अर्यालले उक्त सडकखण्ड सुधार्नेभन्दा पनि विस्तार गर्ने काम बढी भएकोले समस्या आएको बताए ।
स्थानीय बासिन्दाहरुले सरकारले बर्सेनि बजेट छर्नेमात्रै काम गर्दा करोडौँ रूपैयाँ खर्च गरेर पनि दिगो बाटो निर्माण हुन नसकेको भन्दै हचुवाको भरमा सडक निर्माण गर्दा सडक वर्षौंसम्म पनि दिगो हुन नसकेको भन्दै आक्रोश पोख्दै आएका छन् ।
