राजनीतिक दल महिला मैत्री हुनुपर्ने

नवलपरासी । राजनीतिक दल महिला मैत्री नहुँदा नेतृत्व तहमा महिला पुग्न नसकेको एक कार्यक्रमका सहभागीले बताएका छन् । १०४ औँ अन्तर्राष्ट्रिय श्रमिक महिला दिवसको पूर्वसन्ध्यामा परासीमा आयोजना गरिएको महिला व्यक्तित्व र नेतृत्व आजको आवश्यकता विषयक जिल्लास्तरीय अन्तक्र्रिया कार्यक्रमका सहभागीले सो कुरा बताएका हुन् ।
महिलालाई राजनीतिमा पूर्ण रुपमा सहभागिता गराउन दलहरुले राम्रो भूमिका खेल्न नसके पनि  त्यसका लागि महिलाहरु आफै अग्रसर हुनु पर्नेमा जोड दिइएको छ । राजनीति नै सबै नीतिको मूल नीति भएकाले नीति निर्माणका लागि महिला राजनीतिमा लाग्नु पर्ने, महिलाहरु एकजुट भएर अगाडि बढ्नुपर्ने र अधिकार प्राप्तिका लागि संघर्षको आवश्यकता रहेकाले यसलाई निरन्तरता दिनुपर्ने सहभागीको भनाइ छ ।
नेतृत्व र व्यक्तित्व विकास नभएसम्म महिला अगाडि बढ्न नसक्ने भएकाले त्यसको आवश्यकता रहेको सहभागीको बुझाइ छ । कार्यक्रममा संविधानसभा सदस्य सिन्धु जलेसाले संविधानसभामा ३३ प्रतिशत महिला सहभागिता गराउनुपर्ने अन्तरिम संविधानमा व्यवस्था गरिए पनि राजनैतिक दलहरुले २९ प्रतिशतमात्र महिलालाई प्रतिनिधित्व गराएको बताइन् । भर्खर विस्तार गरिएको मन्त्रिमण्डलमा पनि महिलाको सहभागिता न्यून गराइएकाले सहभागिता बढाउनका लागि दवाव सिर्जना गरिएको जनाइन् ।
स्थानीय निकायमा हुने निर्वाचनमा महिलालाई ५१ प्रतिशत सिट दिलाउनका लागि सदनमा कुरा उठाउने उनले जानकारी दिइन् । पूर्व सभासद सीता बैडेलले महिला सभासदहरुले महिलामैत्री संविधान निर्माणका लागि राम्रो भूमिका निर्वाह गर्न सुझाव दिएकी छन्  ।
महिला तथा बालबालिका कार्यालय, सहमति र रेडियो परासीको संयुक्त आयोजना तथा सञ्चारिका समूह नवलपरासी, जिल्ला विकास समिति, रामग्राम महिला जेसिज, रामग्राम जेसिज, माइती नेपाल, डब्लुडब्लुजे, संकल्प, पिएसआई पोखरा र नेपाल परिवार नियोजन संघ नवलपरासीको सहकार्यमा आयोजना गरिएको कार्यक्रममा सहायक प्रमुख जिल्ला अधिकारी कृष्णश्याम बुढाथोकी, जिविसका सूचना अधिकृत पुष्कर काफ्ले, अनेमसंघ जिल्ला अध्यक्ष विमला अर्याल, नेपाल महिला संघ जिल्ला अध्यक्ष लक्ष्मी पाण्डे, सहमतिका करुणासागर सुवेदीलगायतले शुभकामना व्यक्त गरेका थिए ।
कार्यक्रममा एमालेका तर्फबाट समानुपातिकमा  मनोनित सभासद सिन्धु जलेसालाई संविधान निर्माणमा कुशल भूमिका निर्वाह गर्नका लागि सम्मान गरिएको छ । त्यसैगरी, जिल्लामा रही महिला तथा बालबालिकाको सशक्तिकरणका क्षेत्रमा निरन्तर कलम चलाएकाले पत्रकार कल्पना भट्टराईलाई पनि सम्मान गरिएको थियो ।