विश्व वन्यजन्तु दिवसः डुङ्गाबाट राप्ती नदीमा गस्ती

कसरा । विश्व वन्यजन्तु दिवसको अवसरमा चितवन राष्ट्रिय निकुञ्जले सोमबार डुङ्गाबाट नदी गस्ती गरेको छ ।
निकुञ्ज हुँदै बग्ने राप्ती नदीमा डुङ्गाबाट गस्ती गरिएको हो । निकुञ्जका सहायक संरक्षण अधिकृत टीकाराम पौडेलका अनुसार मुख्य कार्यालय कसरा र सौराहाबाट डुङ्गाको सहायताले निकुञ्जको गस्ती गरिएको हो । अन्य दिनहरूमा पनि गस्ती गरिने भए पनि सोमबार विश्व वन्यजन्तु दिवसको अवसर पारेर नदी संरक्षणमा जुट्न सबैलाई अपिल गर्दै डुङ्गा गस्ती गरिएको अधिकृत पौडेलले जानकारी दिनुभयो । उहाँका अनुसार यस कार्यले नदीको संरक्षण गर्नुपर्ने भन्ने कुरामा चेतना बढ्छ ।
यसैगरी संरक्षण दिवसकै अवसर पारेर सौराहामा वन्यजन्तुको संरक्षण र व्यवस्थापन विषयमा सरोकारवालासँगको अन्तक्र्रिया कार्यक्रम गरिएको छ ।
कार्यक्रममा निकुञ्जका कर्मचारी, नेपाली सेना, तराई भू–परिधि कार्यक्रमका प्रतिनिधि, मध्यवर्ती सामुदायिक वनका प्रतिनिधि, पर्यटनसँग सम्बन्धित विभिन्न सङ्घसंस्थाका प्रमुख एवम् प्रतिनिधिहरूको उपस्थिति रहेको थियो ।
कार्यक्रममा निकुञ्जका सहायक संरक्षण अधिकृत रमेश थापाले वन र वन्यजन्तुको संरक्षणको विषयमा प्रकास पार्नुभएको थियो । संयुक्त राष्ट्रसङ्घले सन् २०१३ को डिसेम्बर २० मा हरेक वर्षको मार्च ३ लाई विश्व वन्यजन्तु दिवसको घोषणा गरेपछि पहिलो दिवसका रूपमा सोमबार विश्वभर यो दिवस मनाइएको छ ।