जनतालाई सास्ती नदेऊ

नेपालमा राष्ट्रप्रमुख तथा सरकारका उच्चपदस्थ व्यक्तित्वहरुकोे सवारी तथा विदेश भ्रमणलगायत कार्यक्रममा घन्टौँसम्म सडक जाम हुने गरेको पाइएको छ । सुरक्षा प्रबन्धका नाममा सर्वसाधारणहरुलाई सास्ती दिने प्रवृत्ति हटाउनु त परै जाओस्, त्यसमा न्यूनीकरणसमेत भएको पाइँदैन । यही परम्पराको पुनरावृत्ति आइतबार प्रधानमन्त्री सुशील कोइरालाको विदेश भ्रमणका क्रममा पनि भयो । प्रधानमन्त्री कोइराला तेस्रो शिखर सम्मेलनका लागि म्यान्मा प्रस्थान गर्ने क्रममा सुरक्षा निकायले सडकमा सार्वजनिक तथा निजी गाडी गुडाउन रोक लगाएको थियो । जनताले सास्ती पाएको विषयमा स्वयं प्रधानमन्त्री कोइराला असन्तुष्ट भएपछि यस विषयले चर्चा पाएको छ । उनले ‘जनताको प्रधानमन्त्री जनतासँगै बाटोमा हिँड्न पाउनुपर्छ’ भन्दै मुख्य सचिव लीलामणि पौडेलसँग असन्तुष्टि पोखेका थिए । जनताको सुविधालाई पहिलो प्राथमिकता दिँदै सडक जाम गरेर दुःख दिने कार्य रोक्नुपर्ने महान् विचार प्रकट गरेर कोइरालाले आफू जनताको प्रधानमन्त्री भएको प्रमाणित गरेका छन् ।
नेपालमा ‘कहीँ नभएको जात्रा हाँडी गाउँमा’ भन्ने उखानलाई चरितार्थ गर्ने गरी जनतालाई अनावश्यक दुःख दिने गरिएको छ । हाम्रो देशमा राष्ट्रपति, सरकार प्रमुख, मन्त्रीहरु, उच्चपदस्थ नेता, राष्ट्रसेवक कर्मचारीबाहेक अरुको आधारभूत अधिकारको कदर हुँदैन । सरकार र राष्ट्रप्रमुखको भ्रमणको शैली नै यस्तो हुने विगतको परम्परा भएको मुख्य सचिवको भनाइले नेपालको बेथिति उदाङ्गो भएको छ । जनतालाई घन्टौँ जाममा कुराएर सुरक्षा प्रबन्ध हुनेभन्दा सुरक्षा चुनौती बढ्ने सम्भावनातर्फ सम्बन्धित निकायले ध्यान दिनुपर्छ ।
प्रधानमन्त्री कोइरालाले म्यान्माबाट फर्केपछि यस्तो परम्परा अन्त्यका लागि यस विषयमा ध्यान दिने उनका प्रेस सल्लाहकार दिनेश भट्टराईले जनाएका छन् । यो परम्परा हटाउने विषयमा ध्यानाकर्षण हुनु नै सकारात्मक कुरा हो । सुरक्षाकर्मीले सुरक्षा व्यवस्थाका नाममा हजारौँ जनतालाई सास्ती दिने विषय आफैँमा विडम्बनापूर्ण मानिएको छ । यस्तो परम्परा एकैचोटि अन्त्य हुने सम्भावना नभए पनि यस्ता विषयमा जनताका तर्फबाट सरकार प्रमुखले असन्तुष्टि जाहेर गर्नु शुभ संकेत मान्न सकिन्छ । सादा जीवन बिताउने कोइराला जनताको आधारभूत अधिकारप्रति कतिसम्म संवेदनशील रहेछन् भन्ने पनि यस घटनाले पुष्टि गरेको छ । जनतालाई दुःख दिएर होइन, उनीहरुको अधिकारलाई सम्मान गर्नुपर्छ भन्ने उनको भनाइ आत्मसात् गर्नसके मुलुकमा परम्परा बनेर बसेका यस्ता विकृति हटाउन सहज हुने विश्वास गर्न सकिन्छ ।