‘राप्रपा नेपाल सशक्त प्रतिपक्षमा’

भरतपुर । राष्ट्रिय प्रजातन्त्र पार्टी नेपालका अध्यक्ष कमल थापाले सत्ता स्वार्थमा बनेको अहिलेको सरकारबाट जनताको अपेक्षा पूरा हुनेमा आशङ्का व्यक्त गर्नुभएको छ ।
चितवनमा एक व्रतबन्ध समारोहमा सरिक हुन आउनुभएको उहाँले आज यहाँ पार्टी कार्यकर्तासँग छलफल गर्दै गुट उपगुटमा बनेको सत्ता समीकरणले मुलुकलाई समाधान दिनेमा आफू विश्वस्त नरहेको बताउनुभयो ।
उहाँले सरकारको सफलताका लागि शुभेच्छा प्रकट गर्दै राप्रपा नेपाल सशक्त प्रतिपक्षको भूमिकामा कटिबद्ध रहेको प्रष्ट पार्नुभयो । एमाओवादीसमेत सत्ता लिप्सामा गएर उपसभामुखमा उम्मेदवारी दिएको उहाँको भनाइ थियो । अध्यक्ष थापाले विगतमा गरिएका प्रतिबद्धता दलहरूले भुल्दै गएकाले जनताको चाहना पूरा हुनसक्ने अवस्था नदेखिएको दाबी गर्नुभयो ।
उहाँले पार्टीेको महाधिवेशनका लागि तयार रहन र सङ्गठन विस्तारमा लाग्न कार्यकर्तालाई निर्देशन दिएको राप्रपा नेपाल चितवनका अध्यक्ष बद्री तिमिल्सिनाले जानकारी दिनुभयो । राप्रपा नेपालले जेठको पहिलो हप्ता महाधिवेशनको मिति तोकेको छ ।
सङ्गठन विस्तार र जिल्ला अधिवेशन तत्कालै गर्नसमेत उहाँले कार्यकर्तालाई निर्देशन दिएको तिमिल्सिनाले बताउनुभयो ।