रत्ननगर । इलाका प्रहरी कार्यालय रत्ननगरले पछिल्लो ६ महिलाको अवधिमा २५ सय लिटर अवैध घरेलु मदिरा नष्ट गरेको छ । गत भदौं महिनावाट सुरू गरिएको घरेलु मदिरा बरामद गरी नष्ट गर्ने कार्यअन्तर्गत फागुनसम्म आइपुग्दा २५ सय लिटर अवैध घरेलु मदिरा नष्ट गरिएको प्रहरी निरीक्षक केदार पन्तले जानकारी दिनुभयो ।
प्रहरीले भदौ महिनामा ९०० लिटर, असोज महिनामा ५५० लिटर, कार्तिक महिनामा १७० लिटर, मंसिर महिनामा ३५० लिटर, माघ महिनामा २५० लिटर र फागुन महिनामा १६० लिटर घरेलु मदिरा बरामद गरी नष्ट गरेको छ । प्रहरीले रत्ननगरका विभिन्न वडा, जुटपानी, पिठुवालगायतका ठाउँबाट मदिरा बेच्दै गरेको तथा बेच्न लैजाँदै गरेको अवस्थामा बरामद गरेको हो । रत्ननगर इलाका प्रहरी कार्यालयले रत्ननगरका विभिन्न ठाउँबाट बरामद गरिएको १६० लिटर अवैैध घरेलु मदिरा आइतबार नष्ट गरेको छ ।
बरामद गरिएको अवैध मदिरा पत्रकार, स्थानीयवासीको रोहवरमा नष्ट गरिएको प्रहरी निरीक्षक पन्तले जानकारी दिनुभयो । रक्सी खाएर समाजमा होहल्ला गर्ने वितण्डा मच्चाउने गतिविधि बढ्न थालेपछि इलाका प्रहरी कार्यालय रत्ननगरले घरेलु मदिरा बरामद गरी नष्ट गर्ने कार्यलाई तीव्रता दिएको छ । विगत ६ महिला अधिवाट सुरू भएको मदिरा बरामद गरी नष्ट गर्ने कार्यअन्तर्गत अहिलसम्म झण्डै तीन हजार लिटर घरेलु मदिरा बरामद गरी नष्ट गरिएको प्रहरी निरीक्षक पन्तले बताउनुभयो ।
Discussion about this post