गाडीको ठक्करले तीन मृग मरे

रत्ननगर । पूर्वपश्चिम राजमार्गअन्तर्गत रत्ननगर खगेरी पुलनजिक बिहीबार बिहान सवारी साधनले ठक्कर दिँदा तीन वटा बयस्क मृग (चित्तल) मरेका छन् । ठक्करबाट अर्को एक मृग घाइते भएकाले टिकौलीस्थित सशस्त्र प्रहरीको कार्यालयमा उपचारका लागि राखिएको छ । वन्यजन्तुको कोरिडोर क्षेत्रमा चित्तल मरेको चितवनका प्रमुख जिल्ला अधिकारी नरेन्द्रराज शर्माले बताउनुभयो ।
चितवन राष्ट्रिय निकुञ्ज र बीसहजारी ताल क्षेत्रसँग जोडिएको टिकौली जङ्गलबाट सडक पार गरेर अर्को छेउको जङ्गलमा जान थालेका मृगको बथानलाई गाडीले ठक्कर दिएको थियो ।
मध्यवर्ती क्षेत्रको कोरिडोरका रूपमा रहेको टिकौली जङ्गलमा मृगहरूको राम्रो बासस्थान छ । बाघ तथा ठूला जनावरको आहारा मृग मानव अतिक्रमणका कारण सङ्कटमा पर्दै गएको छ । जङ्गलकै बीचमा मुख्य राजमार्ग हुनाले पनि मृगसहित अरू थुप्रै वन्यजन्तुले अकालमै ज्यान गुमाउने गरेका छन् ।
चितवन राष्ट्रिय निकुञ्जसहितका संरक्षण गर्ने निकायहरूले बाघ, गैँडाजस्ता वन्यजन्तुको संरक्षण कार्यक्रम चलाए पनि यस्ता आहारा प्रजातिका वन्यजन्तुको संरक्षणमा खासै ध्यान दिन नसकेको संरक्षणकर्मीहरूको गुनासो छ । मरेको मृगलाई निकुञ्जको संरक्षणमा रहेका बाघको आहाराका लागि प्रयोग गरिने चितवन वन कार्यालयले जनाएको छ ।