योजना तर्जुमा बैठक

हेटौँडा । मकवानपुरको सहभागितात्मक एकीकृत जिल्ला विकास योजनाका लागि आर्थिक वर्ष २०७१÷७२ को एकीकृत योजना तर्जुमा बैठक हेटौँडामा सम्पन्न भएको छ ।
कार्यक्रममा विषयगत योजना तर्जुमा समितिहरुले आगामी आर्थिक वर्षको अनुमानित कार्यक्रम र बजेट प्रस्तुत गरेका थिए । कार्यक्रममा समितिहरु भौतिक पूर्वाधार विकासतर्फ संयोजक खानेपानी तथा सरसफाई डिभिजन कार्यालय इन्जिनियर हरि पौडेल, वन तथा वातावरणतर्फ संयोजक जिल्ला वन कार्यालयका प्रमुख इमामुद्दिन अन्सारी, सामाजिक विकासतर्फ संयोजक जिल्ला शिक्षा अधिकारी खडगबहादुर कुमाल, जिल्ला स्वास्थ्य कार्यालयका प्रमुख मधुसुदन कोइराला र महिला तथा बालबालिका कार्यालयकी महिला विकास अधिकृत प्रतिमा मिश्रले नीति, कार्यक्रम तथा बजेट प्रस्तुत गरेका थिए ।
यस्तै, आर्थिक विकासतर्फ संयोजक जिल्ला कृषि विकास कार्यालयका प्रमुख महेश रेग्मी, जिल्ला पशु सेवा कार्यालयका प्रमुख सूर्य पौडेल, डिभिजन सहकारी कार्यालयका प्रमुख भीम परियार, घरेलु तथा साना उद्योग कार्यालयका प्रमुख कमलप्रसाद घिमिरेले नीति, कार्यक्रम तथा बजेट प्रस्तुत गरेका थिए ।
कार्यक्रममा मकवानपुरमा रहेका सरकारी कार्यालय, गैरसरकारी संघसंस्था तथा राजनीतिक दलका प्रमुखहरुको सहभागिता रहेको थियो । मकवानपुरका स्थानीय विकास अधिकारी गोकर्णप्रसाद शर्माको अध्यक्षतामा भएको कार्यक्रममा जिविसका सामाजिक विकास अधिकृत रामकृष्ण थापाले सहजीकरण गरेका थिए ।