काँग्रेस–एमालेबीच दस÷दस मन्त्रालय वितरणमा सहमति

नारायणगगढ । नेपाली काँग्रेस र नेकपा (एमाले) बीच हाललाई दस÷दस वटा मन्त्रालय बाँडफाँड गर्ने अनौपचारिक सहमति भएसँगै मन्त्रिमण्डलको विस्तार चाँडै हुने भएको छ ।
उपप्रधानमन्त्रीसहित गृह मन्त्रालय एमालेलाई दिन प्रधानमन्त्री सुशील कोइराला तयार भएपछि दुई दलबीच आइतबार वार्ता प्रारम्भ भएको थियो । आज बिहानसम्मको अनौपचारिक वार्ता र सहमतिका आधारमा हाललाई दुवै दललाई दस÷दस वटा मन्त्रालय वितरण गरिने भएको एमालेका केन्द्रीय सदस्य कृष्णगोपाल श्रेष्ठले बताउनुभयो ।
श्रेष्ठका अनुसार काँग्रेसलाई रक्षा, अर्थ, सूचना तथा सञ्चार, सहरी विकास, शिक्षा, स्थानीय विकास, आवास तथा भौतिक, शान्ति तथा पुनःनिर्माण र कानुन तथा न्याय र एमालेलाई गृह, परराष्ट्र, सामान्य प्रशासन, स्वास्थ्य तथा जनसङ्ख्या, संस्कृति÷पर्यटन, वन तथा भूसंरक्षण, युवा तथा खेलकुद, कृषि तथा सहकारी, भूमिसुधार र ऊर्जा मन्त्रालयको जिम्मेवारी दिने तयारी भएको छ ।
कुल २६ वटा मन्त्रालयमध्ये बाँकी पाँच वटा मन्त्रालय हाललाई प्रधानमन्त्रीले राख्ने र सहमतिका आधारमा अन्य साना दललाई दिइने भएको छ । नेकपा (माले) र राष्ट्रिय प्रजातन्त्र पार्टी पनि सरकारमा जाने भएका छन् ।
मन्त्रालयको वितरणबारे दुवै दलको वार्ता टोलीले तयार गरेको सो खाकामा शीर्ष नेताबीच अन्तिम छलफल भई सम्भवतः आज साँझसम्ममा मन्त्रिमण्डल विस्तार गरिने छ ।
दुवै दलका पदाधिकारी तथा स्थायी कमिटीको अनौपचारिक बैठक अहिले अलग–अलग बसिरहेको छ ।
सोमबार पनि सरकारले पाएन पूर्णता
यसैबीच संसदबाट प्रधानमन्त्री निर्वाचित भएको दुई हप्ता वित्दासमेत सरकारले पूर्णता पाउन सकेको छैन् । काँग्रेस र एमालले बनाउने भनेको सरकार मन्त्रालय बाँढफाँडका कारण पूर्णता पाउन नसकेको हो ।
दुई पार्टीबीच सोमबार मन्त्रालय बाँढफाँडमा सहमति भए पनि पार्टीको आन्तरिक विवादका कारण मन्त्रिपरिषदले आज पूर्णता पाउन सकेन् । आइतबार नै एमालेलाई गृह दिएर मन्त्रिपरिषद विस्तारको तयारीमा रहेका प्रधानमन्त्री कोइरालाले आज पनि मन्त्रिपरिषद विस्तार गर्न सकेनन् ।
प्रधानमन्त्री कोइरालाले सोमबार नै मन्त्रिपरिषद् विस्तारको तयारी गरेपनि कांग्रेस र एमालेले मन्त्रीहरुको नाम टुङ्गो लगाउन नसकेपछि उनी मन्त्रिपरिषद विस्तारका लागि असफल भएका हुन् ।
बाँकी मन्त्रीहरु पछि पठाउने भन्दै एमालेले उपाध्यक्ष वामदेव गौतमलाई मात्र सपथ खुवाउन आग्रह गरेको थियो । यसअघि आइतबार एमालेबाट गौतमसँगै सचिव विष्णु पौडेललाई पनि सरकारमा पठाउने निर्णय गरेको थियो । तर उनलाई पठाउने भनेको सञ्चार मन्त्रालय काँग्रेसको भागमा परेपछि उनलाई पठाउने नपठाउनेमा एमाले अनिर्णयमा रहेको छ ।
कांग्रेसले पनि मन्त्रीहरुको नाम टुङ्गो लगाउन बाँकी रहेकाले सपथ हुन सकेन ।
बालुवाटार स्रोतका अनुसार सोमबार मन्त्रिपरिषद् विस्तार नहुने भएको छ । कांग्रेस सहमहामन्त्री पूर्णबहादुर खड्काले छलफल जारी रहेको भन्दै मन्त्रिपरिषद् विस्तारको सम्भावना कम रहेको बताए ।
यसैबीच नेकपा एमालेको स्थायी समितिको बैठकले पार्टीबाट सरकारमा पठाउने मन्त्रीहरुको नामावली छान्ने जिम्मा अध्यक्ष झलनाथ खनाल, संसदीय दलका नेता केपी ओली र उपाध्यक्ष वामदेव गौतमलाई दिएको छ ।
सोमबार धापासी स्थित ग्राण्डी इन्टरनेसनल हस्पिटलमा बसेको बैठकले मन्त्री बन्ने नेताको नाम छान्ने जिम्मा शीर्ष तीन नेतालाई दिएको हो । मन्त्री बन्ने नेताको नामावली तीन नेताले टुंगो लगाउने निर्णय भयो महासचिव इश्वर पोखरेलले जानकारी दिए ।
उनले जिम्मा दिएका नेताहरुले पार्टीमा थप छलफल गरेर मन्त्री बन्ने नेताहरुको टुंगो लगाउने बताए । महासचिव पोखरेलले मन्त्रीको नाम छान्दा बरिष्ठ नेता माधव नेपालसँग पनि छलफल हुने बताए ।
त्यस्तै चुनावमा विजयी भएकालाई प्राथमिकता दिन पनि वैठकले निर्देशन दिएको छ । बैठकपछि उपाध्यक्ष गौतम र सचिव विष्णु पौडेल प्रधानमन्त्री सुशील कोइरालालाई भेट्न बालुवाटार पुगेका थिए । उनीहरु आधा घण्टा प्रधानमन्त्रीसँग छलफल गरेर बाहिरीएका थिए ।