यन्त्रीकरण प्रदर्शनीमा उत्साह बढ्दो

भरतपुर । कृषिमा यान्त्रीकरण गरी खाद्य सुरक्षामा टेवा पु¥याउने उद्देश्यले चितवनको नारायणी नदी किनारमा संचालित राष्ट्रिय कृषि यान्त्रीकरण प्रदर्शनीमा किसानहरुको उत्साह बढ्दै गएको छ । शनिबार विभिन्न १६ जिल्लाका हजारौं कृषकहरुले प्रदर्शनीको अवलोकन गरेका छन् ।

चितवनलगायत विभिन्न जिल्लाबाट किसानहरु प्रदर्शनी अवलोकनका लागि समूहगत रुपमा आएका छन् । उनीहरुले यन्त्रीकरणले उत्पादन वृद्धि गर्नमा सहयोग गर्ने विश्वास व्यक्त गरेका छन् । प्रतियोगिताअन्तर्गत शनिबार भएको यन्त्रीकरणसम्बन्धी अन्तरत्र्रिmयामा विज्ञरुले कृषिमा प्रविधिको विकास गरे उत्पादन दोव्बरले बढ्ने बताएका थिए । कृषि इन्जिनियरिङ महाशाखाका  निमित्त कार्यकारी निर्देशक मधुसुदनसिंह बस्नेतले खाद्य सुरक्षाका लागि पनि कृषिमा यन्त्रीकरण अत्यावश्यक भएको बताउनुभयो ।
कृषकहरुले आधुनिकखेती प्रणाली र यन्त्रीकरणमा सरकारी योजनाबारे जिज्ञासा राखेका थिए । बुढान कृषक बहुमुखी सहकारी संस्था लिमिटेड बर्दियाकी उपाध्यक्ष इन्दिरा सुवेदीले यस्ता प्रदर्शनी जिल्ला जिल्लामा हुनुपर्ने तथा सरकारले अनुदानको व्यवस्था गर्नुपर्नेमा जोड दिनुभयो । मेची कृषक बहुमुखी सहकारी संस्था झापाका उपाध्यक्ष दुर्गाप्रसाद सापकोटाले सरकारले मेसिन खरिदमा अनुदान दिने सुनिए पनि यसबारे दूरदराजका कृषक जानकार नरहेकाले उपकरणको प्रयोग हुन नसकेको उल्लेख गर्नुभयो ।
[divider]प्रतियोगितामा शुक्रनगरको कृषि सहकारी पहिलो
प्रदर्शनी अन्तर्गत शनिबार कृषकहरुबीच यन्त्रीकरणसम्बन्धी प्रतियोगितात्मक सांस्कृतिक कार्यक्रम भएको छ  । कार्यक्रममा देशका विभिन्न जिल्लाबाट आएका दुई दर्जन बढी कृषक समूहले भाग लिएका थिए ।  यन्त्रीकरणको विषयमा भएको प्रतियोगितात्मक कार्यक्रममा चितवन शुक्रनगरको मातृभूमि महिला सहकारी प्रथम हुन सफल भएको छ ।
यस्तै, गैंडाकोट बचत तथा ऋण सहकारी संस्था दोस्रो र शारदानगरको सयपत्री आईपीएम कृषक समूह तेस्रो हुन सफल भएको छ । कृषि विकास कार्यालय ललितपुरको कृषक समूहले सान्त्वना स्थान हासिल गरेको निर्णायक समितिका सदस्य सहनलाल प्रधानले जानकारी दिनुभयो । प्रतियोगिताका विजयीहरुलाई समापनको दिन १२ गते पुरस्कार वितरण गरिने आयोजकले जनाएको छ ।
प्रदर्शनीमा १६ देशका करिव ५०० कृषि उपकरण तथा प्रविधि प्रदर्शनीमा छ ।  कृषि विभागको कृषि इन्जिनियरिङ निर्देशनालय, नेपाल कृषि अनुसन्धान परिषद्, कृषि उद्यम केन्द्र आयोजक रहेको प्रदर्शनीको सहआयोजकमा जिल्ला कृषि कार्यालय, जिल्ला पशुसेवा, राष्ट्रिय मकैबाली अनुसन्धान कार्यक्रम र उद्योग वाणिज्य संघ चितवन रहेको छ ।
प्रदर्शनीमा धान रोप्ने, गोड्ने, खेत सम्याउने, कफी छोडाउने, सिंचाइ, मकै छोडाउने,  तथा दूध, फलफूल, मासु प्रशोधनसम्बन्धी नवीन प्रविधि तथा उपकरणहरु राखिएका छन् ।
प्रदर्शनीको दोस्रो दिन पूर्वमन्त्री तथा तराई मधेस राष्ट्रिय अभियान पार्टीका अध्यक्ष  जयप्रकाशप्रसाद गुप्ताले प्रदर्शनीको अवलोकन गर्नुभएको छ ।
सप्तरीमा सुन्दरी फार्म सञ्चालन गर्दै आएका गुप्ताले आधुनिक कृषिका लागि उपकरणको महत्व हुने भएकाले अवलोकनका लागि आफू चितवन आएको बताउनुभयो । उहाँले नयाँ प्रविधिले मात्रै कृषिमा क्रान्ति हुनेसमेत उल्लेख गर्नुभयो । शनिबार नै पूर्व नायिका मौसमी मल्लले पनि प्रर्दशनीको अवलोकन गर्दै कृषिमा यन्त्रीकरण अत्यावश्यक भएको बताउनुभयो ।