धादिङ । नदी तथा खोलामा मेसिन प्रयोग गरेर बालुवा उत्खनन गर्न रोक लगाइएको भए पनि प्रहरी प्रशासनको आँखा छल्दै धादिङमा बालुवा तस्करहरुले मेसिनको प्रयोग गरिरहेका छन् ।
खोलामा बालुवा झिक्न बनाएको पोखरीमा डुबेर धादिङको गजुरी गाउँपालिका वडा नम्बर ६, ठूलीफाँट दरिङाल खोलामा शनिबार बिहान १० बजेतिर दुई जना युवाको ज्यान गएको छ । मेसिनले बनाएको खाल्डोमा डुबेर दुई जनाको ज्यान गएपछि आक्रोशित स्थानीयले खोलामा रहेका तीनवटा स्काभेटरमा आगजनी गरिदिएका छन् । गैरकानुनी कार्यमा संलग्न भई सार्वजनिक स्थलमा खाडल खनी मान्छेको ज्यान जाने अवस्था सिर्जना गराउनेमाथि कारबाहीको माग गर्दै खोलामा डुबेर मृत्यु भएका युवाको शव खोलाबाट निकाल्न स्थानीयले दिएका छैनन् ।
खोलामा बालुवा निकाल्ने काम गर्दै आएका गजुरी गाउँपालिका वडा नम्बर ७ का १९ वर्षका भीम तामाङ र २१ वर्षका सुमन तामाङ शनिबार खोलामा डुबेका थिए । खोला गहिरो बनाएर खनेका कारण दुवैजना खाडलमा परेर ज्यान गएको स्थानीयले बताए । देख्दादेख्दै दुई जना युवाको अकालमा ज्यान गएपछि आक्रोशित हुन पुगेका गाउँलेले तीनवटा स्काभेटरमा आगजनी गरिदिएका हुन् । आगजनीबाट स्काभेटर पूरै जलेको छ ।
स्थानीयले पटकपटक खोलामा मेसिन नलगाउन दबाब दिँदै आए पनि बालुवा तस्करहरुले रातिको समय पारेर गहिरो खाडल बनाई बालुवा निकाल्दै आइरहेको स्थानीयवासी बताउँछन् ।
यसअघि दरियाल खोलामा गैरकानुनी ढंगबाट सञ्चालन गरिएका तीनवटा मेसिन स्थानीय र प्रहरीले नियन्त्रणमा लिएका थिए । जिल्ला समन्वय समितिले एउटा मेसिनलाई ५० हजार जरिवाना गरेको भए पनि अरु मेसिन भने स्थानीय तह र प्रहरी प्रशासनको मिलेमतोमा जरिवाना नभई छुटेका थिए ।
एक साताअघि यहाँका स्थानीयले सदरमुकाम धादिङबेँसी पुगेरै जिल्ला प्रशासन कार्यालयमा धर्ना दिई प्रमुख जिल्ला अधिकारी भागीरथ पाण्डेलाई भेटेर खोलामा मेसिन लगाउन रोकिदिन आग्रहसमेत गरेका थिए । घटनाको जानकारी आएपछि घटनास्थलमा प्रहरी परिचालन गरिएको छ । आक्रोशित भीडले खोलामा रहेका सबै मेसिन जलाउने चेतावनी दिएपछि थप क्षति हुन नदिन सशस्त्र प्रहरी बल आदमघाट र इलाका प्रहरी कार्यालय गजुरीबाट प्रहरी परिचालन गरिएको छ ।
