मन्त्रिमण्डल विस्तारको अन्योल हट्ने ः प्रधानमन्त्री

    काठमाडौँ । प्रधानमन्त्री सुशील कोइरालाले मन्त्रिमण्डल विस्तारमा देखिएको अन्योललाई आपसी संवादबाट हट्ने बताउनुएको छ ।
व्यवस्थापिका–संसद्को आजको बैठकमा विभिन्न पार्टीका सभासद्ले नवनिर्वाचित प्रधानमन्त्री कोइरालालाई बधाई तथा शुभकामना दिएपछि सम्बोधन गर्दै उहाँले सरकारमा अधिकतम दलको सहभागिता गराउन भगीरथ प्रयत्न विश्वास पनि व्यक्त गर्नुभयो ।  प्रधानमन्त्री कोइरालाले एक वर्षभित्र नयाँ संविधान बनाउन सबै दलले निर्वाचनका बेला व्यक्त गरेको सङ्कल्पले दलहरूको परिपक्वता र जिम्मेवारीबोध व्यक्त गरेको भन्दै अघिल्लो संविधानसभाले पूरा गर्न नसकेको संविधान निर्माणको जटिल कार्य पूरा गराउने अठोट व्यक्त गर्नुभयो ।
राष्ट्रपतिले गत साता आफूलाई सातबुँदे निर्देशन दिएको भनी उठेको आवाजका सम्बन्धमा स्पष्ट पार्दै उहाँले त्यसलाई नियमित भेट र समसामयिक विषयप्रति राष्ट्रपतिको चिन्ताका रुपमा लिन आग्रह गर्नुभयो ।
प्रधानमन्त्री कोइरालाले संविधानसभाका अध्यक्ष सुवास नेम्वाङको निर्वाचनका समयमा सदनमा देखिएको उच्च सहमतिको संस्कारको प्रशंसा गर्दै नेम्वाङलाई एक वर्षभित्र संविधान जारी गर्ने कार्यमा सफलता मिलोस् भनी कामना गर्नुभयो ।
सभासद्ले आफूलाई दिनुभएको शुभकामना, गुनासा र आलोचनाबाट प्रेरणा लिँदै अघि बढ्ने प्रण गर्दै प्रधानमन्त्री कोइरालाले सरकारले पारदर्शिता, सुशासन, जिम्मेवारीपन र  शान्ति स्थायित्वमा ध्यान दिँदै सङ्घीय लोकतान्त्रिक गणतन्त्रको संविधान जारी गराउन र  विकास निर्माणका कार्यमा प्राथमिकता दिइने जानकारी दिनुभयो ।
उहाँले नेपालमा परिवर्तन र विकासका लागि विसं २००७ देखि भएका विभिन्न आन्दोलन र क्रान्ति तथा बलिदानको परिणामबाट प्राप्त लोकतान्त्रिक गणतन्त्रको उपलब्धिलाई संस्थागत गर्नुपर्ने खाँचो  औँल्याउनुभयो । प्रधानमन्त्री कोइरालाले निष्पक्ष र शान्तिपूर्णरुपमा संविधानसभाको निर्वाचन सम्पन्न गराउने तत्कालीन अन्तरिम मन्त्रिपरिषद्का अध्यक्ष, निर्वाचन आयोगलगायतप्रति आभार प्रकट गर्नुभयो ।
उहाँले एक दशक लामो सशस्त्र युद्धलाई शान्ति सम्झौताको बाटामा ल्याउन भूमिका निर्वाह गर्ने राजनीतिक नेता र अगुवालाई स्मरण गर्दै भन्नुभयो–म प्रधानमन्त्री भए पनि आफू  एक साधारण परिवारको सदस्य हुँ, प्रधानमन्त्री पनि मानिस नै भएकाले यो पदमा रहँदा गल्ती हुन सक्छ । रासस