कृषि यान्त्रीकरणको तयारी अन्तिममा

नारायणगढ । नेपालमा पहिलो पटक आयोजना हुन लागेको प्रथम राष्ट्रिय कृषि यान्त्रीकरण प्रदर्शनी २०७० को तयारी अन्तिम चरणमा पुगेको आयोजकले जनाएको छ । यही फागुन ९ गतेदेखि ११ गतेसम्म नारायणगढको नारायणी नदी किनारमा आयोजना हुन लागेको मेलाको तयारी अन्तिम चरणमा पुगेको बुधबार पत्रकार सम्मेलन गरी आयोजकले जनाएको हो ।
कृषि मन्त्रालय, कृषि विभाग, कृषि इन्जिनियरिङ निर्देशनालय, कृषि अनुसन्धान परिषद्को कृषि इन्जिनियरिङ महाशाखा र नेपाल उद्योग महासंघको कृषि उद्यम केन्द्रको संयुक्त आयोजनामा हुन लागेको मेलामा कृषिसम्वन्धी यन्त्रहरुको प्रदर्शन गरिने आयोजक समितिका सदस्यसचिव मधुसुधनसिंह बस्न्यातले जानकारी दिए ।
प्रदर्शनीमा ६० वटा संघसंस्थाका १३० वटा स्टल रहने छन् । जसमा करिब ५०० किसिमका कृषि यन्त्रहरु प्रदर्शन गरिने बस्न्यातले बताए । प्रदर्शनीमा १५ देशमा उत्पादित यन्त्रहरु समावेश गरिनेसमेत उनले जानकारी दिए ।
नेपालका कृषकहरुलाई विभिन्न देश तथा स्थानमा प्रयोग हुँदै आएका कृषि यन्त्रहरुको बारेमा जानकारी दिने उद्देश्यले प्रदर्शनी आयोजना गरिएको उनले बताए । ७५ वटै जिल्लाका कृषकहरुलाई सहभागी गराउने उद्देश्यले कृषि पशुसेवा विभाग तथा मन्त्रालयले जिल्ला प्रत्येक जिल्लाका कृषि कार्यालय तथा पशु सेवा कार्यालयलाई प्रदर्शनीको अवसरमा पारेर कृषक भ्रमणका लागि ल्याउन पत्राचार गरिसकेको सदस्यसचिव बस्न्यातले जानकारी दिए ।
प्रदर्शनीमा कृषि यान्त्रीकरण विषयमा प्रतिष्पर्धात्मक सांस्कृतिक कार्यक्रमको आयोजनासमेत गरिने भएको छ । यस्तो प्रदर्शनी पहिलो पटक आयोजना गर्न लागिएकोले सबै कृषकले यसबाट फाइदा पाउने उनको भनाइ छ ।
यसको सफलतापछि यस्तो प्रदर्शनीलाई अन्य क्षेत्रहरुमा पनि गर्दै लैजाने योजना बनिरहेको बस्नेतले बताए । प्रदर्शनीको उद्घाटन कृषिसचिव जयमुकुन्द खनालले गर्ने छन् ।