अकल्पनीय विमान दुर्घटना

नेपाल वायुसेवा निगमको ‘९ एन एबीबी ट्विनअटर विमान’ आइतबार दिउँसो १ बजे पोखराबाट जुम्लाका लागि उडेको केही समयपछि दुर्घटनाग्रस्त भएको थियो । चालकले भैरहवातर्फ फर्कंदै गरेको बताए पनि जहाज ल्यान्डिङ गर्ने प्रयास सफल हुन सकेको थिएन । जहाजमा चालक दल र यात्रुसहित १८ जना सवार थिए । उनीहरुका परिवार तथा आफन्तजनले आइतबार राति अबेरसम्म सकुशल आउने आश गरे पनि कोही पनि फर्केर आएनन् । अर्घाखाँचीको ढिकुरा गाविसस्थित मसिनेको जंगलमा क्षतविक्षत अवस्थामा विमान खसेको थियो । विमान समुद्री सतहदेखि करिब सात हजार फिट उचाइमा दुर्घटनाग्रस्त भएको उद्धारमा रहेको नेपाली सेनाले जनाएको छ । अकल्पनीय जहाज दुर्घटनाको खबरले यतिबेला सबै देशवासीलाई मर्माहत बनाएको छ ।
मसिने लेकमा रहेको टेलिफोन टावरको उत्तरपूर्व २ सय मिटर तल खोँचमा दुर्घटनाग्रस्त जहाज भेटिएको थियो । स्थानीय युवा सोमबार बिहान हिउँ खेल्न जाने क्रममा करिब ६ बजे जहाजको सानो अवशेष फेला परेको थियो । त्यसैको आधारमा अन्य अवशेष पनि फेला परेको थियो । दुर्घटनामा चिकित्सक, पत्रकार, नेता, सैनिक अधिकारी, बैंकर, शिक्षक, पर्यटक र बालकलगायत परेका छन् । नेपाल वायुसेवा निगमको यही विमान २०४९ असार २१ मा पनि जुम्लामा दुर्घटनामा परेको थियो । तर, विमानमा रहेका सकुशल बाँच्न सफल भएका थिए । निगमसँग उडानयोग्य दुईवटामात्र ट्विनअटर विमान रहेकोमा अब एउटामात्र बाँकी छ भने अन्तर्राष्ट्रिय उडानका लागि दुईवटा जहाज सञ्चालित छन् । अन्य जहाज इन्जिन बिग्रिएर थन्किएको वर्षौं भइसक्दासमेत मर्मत हुन सकेको छैन । मुलुकको प्रतिष्ठासँग जोडिएको विमान मर्मत र उडान सुरक्षाका विषयमा निगम संवेदनशील बन्न सकेको छैन ।
नेपाली विमानको उडान सुरक्षा कमजोर रहेको भन्दै युरोपेली संघले संगठनका सदस्य राष्ट्रमा उडान प्रतिबन्ध लगाएको थियो । उसले आफ्ना नागरिकलाई नेपाली विमान नचढ्न सचेत गराएको थियो । युरापेली संघको प्रतिबन्ध हटाउन नेपालले प्रयास गरिरहेकै अवस्थामा विमान दुर्घटनामा परेपछि उडान सुरक्षा कमजोर रहेको युरोपेली संघको भनाइ प्रमाणित भएको छ । उसो त, नेपालमा खराब मौसम र भौगोलिक अवस्थाका कारण पनि उडान खतरा बढिरहेको छ । विश्वका सबैभन्दा नराम्रा दसको सूचीमा त्रिभुवन विमानस्थल सूचीकृत भइसकेको छ । यतिविघ्न समस्या र चुनौती हुँदाहँुदै पनि बाहिरी मुलुकसँग जोड्ने अन्तर्राष्ट्रिय विमानस्थलको व्यवस्थापनमा समेत सुधार हुन सकेको छैन । आगामी दिनमा उडान सुरक्षाबारे सरकारले गम्भीरतापूर्वक अध्ययन थाल्न जरूरी देखिएको छ । अर्घाखाँचीमा भएको अकल्पनीय विमान दुर्घटनामा निधन हुने चालक दलसहित सबै यात्रुलाई अलबिदा !