३८० जनालाई सीपमूलक तालिम

भरतपुर । रोजगार कोषको सचिवालय र हेल्भेटास स्वीस इन्टरकर्पोरेसन नेपालले सन् २०१४ मा चितवनका ३८० जनालाई सीपमूलक तालिम दिने भएको छ । नेपाल सरकारअन्तर्गत स्थापित रोजगार कोषको सचिवालयले जिल्लामा रहेका १८ देखि ४० वर्षसम्मका युवाहरुलाई तालिम प्रदान गर्नेछ । विभिन्न संस्थामार्फत कोषले चितवनमा तालिम दिन लागेको इम्प्लोइमेन्ट फण्डका टोली नेता बलराम पौडेलले जानकारी दिए ।
रोजगार कोषले प्रत्येक युवाहरुलाई तालिम अवधिभर ५० हजार रुपैयाँ लगानी गर्ने र रोगजारीको लागि तालिम दिने पौडेलले बताए । जसअन्तर्गत कोषले अति विपन्न तथा विशेष अवस्था भएका युवाहरुका लागि चितवनमा जुनियर प्लम्वर, आर्क वेल्डर, विल्डिङ इलेक्ट्रिसियन, सहायक व्यूटिसियन र सामुदायिक पशुपालन सहायक विषयमा १४० युवालाई तालिम दिइ रोजगारको लागि सहयोग गर्ने छ ।
त्यस्तै, कोषले रोजगारी सिर्जनाका लागि लघुउद्यम कार्यक्रमअन्तर्गत इलेक्ट्रिकल तथा इलेक्ट्रिोनिक्स, टेलरिङ र गार्मेन्ट, निमार्ण, स्वास्थ्य र कृषि क्षेत्रका २४० जना युवालाई सीप प्रदान गर्नेछ ।
कोषले सन २०१४ मा नेपालभर १६ हजार युवाहरुलाई सीपयुक्त तुल्याउने लक्ष्य लिएको जसअन्तर्गत १२ हजार युवालाई सिप र रोजगारी तथा ४ हजार युवालाई युवा लघुउद्यमी बनाउने जनाएको छ । सनः २००७ मा स्थापना भएको कोषले सन् २००८ देखि रोजगारमूलक तालिम प्रदान गर्दै युवाहरुलाई स्वरोजगार बनाउँदै आएको छ ।
जसअन्तर्गत सन् २०१३ सम्ममा ७० हजार युवालाई स्वरोजगार तालिम दिएको टोली नेता पौडेलले जानकारी दिए । जसमध्ये ५४ प्रतिशत महिला रहेका छन् ।  कोषले १८ देखि ४० वार्षसम्मका युवाहरुलाई १२१ प्रकारका तालिम दिँदै आएको छ ।
कोषले चितवनमा हालसम्म तीन हजार २०० युवाहरुलाई रोजगार मुलक तालिम प्रदान गरिसकेको छ । यसरी कोषले प्रधान गरेको तालिम लिएका करिब ७२ प्रतिशत युवा रोजगारीमा रहेको एक अनुसन्धानले देखाएको छ । डेभलपमेन्ट भिजन नेपाल नामक संस्थाले गरेको अध्ययनले सन् २००८ देखि सन २०१० सम्म तालिम लिएका ६७ प्रतिशत र सन् २०११ र २०१२ मा तालिम लिएका ७२ प्रतिशत युवा रोजगारीमा रहेको देखाएको हो ।