काठमाडौँ । नेपाली काँग्रेसले नेकपा (एमाले)सँग भएको सात बुँदे सहमतिलाई अनुमोदन गर्दै सो सहमतिअनुरूप संविधानसभाको अध्यक्षको निर्वाचनमा एमालेका उम्मेदवारलाई मत दिने निर्णय गरेको छ । सभाध्यक्षको निर्वाचन आज मंगलबार हुँदैछ ।
साथै कांग्रेसले गृहमन्त्रालयमा आफ्नो अडान यथावत् राख्दै नेकपा (एमाले) लाई मन्त्रिमण्डलमा अविलम्ब सहभागी हुन पनि आह्वान गरेको छ । कांग्रेस केन्द्रीय कार्यालय सानेपामा सोमबार बिहान बसेको संसदीय समितिको बैठकले उक्त निर्णय गरेको हो । सो बैठकमा कांग्रेस र एमालेबीच भएको सहमति कार्यान्वयनसहित मन्त्रिमण्डल गठनलाई अविलम्ब पूर्णता दिनेबारेमा छलफल भएको थियो ।
‘काँग्रेसले एमालेसँग गरेको लिखित सहमतिअनुरूप संविधानसभाको अध्यक्षमा एमालेका उम्मेदवारलाई मत दिने छ र सातबुँदे सहमतिप्रति पूर्णरूपमा प्रतिबद्ध रहेको पनि जनाएको छ’ बैठकपछि केन्द्रीय सदस्य अर्जुननरसिंह केसीले भन्नुभयो ।
अर्का केन्द्रीय सदस्य एवम् मन्त्री डा. रामशरण महतले बैठकमा सातबुँदे सहमतिको पूर्ण कार्यान्वयनअन्तर्गत एउटा बुँदा संविधानसभाको अध्यक्षमा एमालेलाई समर्थन गर्ने पनि भएकाले सोअनुरूप एमाले उम्मेदवारलाई सघाउने र एमालेलाई अविलम्ब सरकारमा सहभागी हुन अग्रसरताका लागि आह्वान गर्ने निर्णय भएको बताउनुभयो । निर्वाचनबाट पहिलो र दोस्रो ठूलो दल बनेको काँग्रेस र एमालेले जनादेशअनुरूप संविधान तथा सरकारमा सहकार्य गरी अघि बढ्ने प्रतिबद्धता गरेअनुरूप एमालेको समर्थनमा काँग्रेस संसदीय दलका नेता सुशील कोइराला प्रधानमन्त्रीमा निर्वाचन भइसक्नुभएको छ ।
सातबुँदे सहमतिका बेला गृहमन्त्रालय आफूलाई दिने भद्र सहमति भएकामा काँग्रेसले त्यसलाई कार्यान्वयन नगरेको दाबी गर्दै एमाले सरकारमा सहभागी भएको छैन ।
प्रधानमन्त्री र काँग्रेसका नेताले समेत गृहमन्त्रालय एमालेलाई दिने सहमति नभएको सार्वजनिक अभिव्यक्ति दिँदै आएका छन् ।
‘गृहबारे प्रधानमन्त्रीले सार्वजनिक रूपमै सहमति भएको छैन भनी सक्नुभएको छ, प्रधानमन्त्रीय पद्धतिलाई केन्द्रबिन्दुमा राखेर गृह काँग्रेसकै रहनुपर्छ र यसमा कुनै खालको सहमति हुन नसक्ने काँग्रेसको दृष्टिकोण हो,’ नेता अर्जुननरसिंह केसीले भन्नुभयो ।
अनि यो पनि
प्रतिकृया
प्रतिकृया
