दृष्टिविहीन विद्यार्थीलाई सहयोग

भरतपुर । स्थापना दिवसको अवसरमा स्वस्तिक नेपाल भरतपुरले नारायणी उच्च माध्यमिक विद्यालयमा आवासीय रुपमा अध्ययन गरेका दृष्टिविहीन विद्यार्थीहरुलाई खाद्यान्न तथा नगद सहयोग गरेको छ ।
स्थापनाको ७ वर्ष पूरा भएको अवसरमा स्वस्तिक नेपालले विद्यार्थीहरुका लागि एक दिनको बिहानी भोजन, खाजा र नगद १० हजार १५ रूपैयाँ सहयोग प्रदान गरेको हो ।
विद्यालयमा दृष्टिविहीन विद्यार्थीलाई आवासीय व्यवस्थापनका लागि सरकारले दिँदै आएको रकम नपुग्ने भएकाले सामाजिक संघसंस्था र व्यक्तिबाटसमेत सहयोग लिने गरिएको प्राचार्य पूर्णप्रसाद दवाडीले बताउनुभयो । २९ जना दृष्टिविहीन अध्ययनरत विद्यालयमा प्रतिविद्यार्थी १६ सय प्राप्त हुने भए पनि ३ हजार ५०० खर्च पुग्ने गरेको जनाउँदै प्राचार्य दवाडीले सहयोगका लागि सामाजिक संघ, संस्था व्यक्तिहरुलाई आग्रहसमेत गर्नुभएको छ ।
२०६३ सालमा स्थापित स्वस्तिक नेपालले रक्तदान, राहत वितरण, ज्येष्ठ नागरिक सम्मानलगायतका सामाजिक कार्यहरु गर्दै आएको संस्थाका अध्यक्ष गणेश पौडेलले बताउनुभयो । संस्थाका निवर्तमान अध्यक्ष सुदीपसिंह अधिकारीले आफूहरुले कुनै दाताहरुसँग सहयोग नलिई सदस्यहरुबाटै रकम उठाएर कार्यक्रमहरु संचालन गर्ने गरिएको बताउनुभयो ।
संस्थामा हाल जिल्लाका ३१ जना सक्रिय युवा उद्यमी, व्यवसायी एवम् सामाजिक कार्यकर्ताहरु सदस्यहरु रहेको संस्थापक अध्यक्ष हिरामान महर्जनले जानकारी दिनुभयो । सहयोग वितरण कार्यक्रममा दृष्टिविहीन विद्यार्थीहरुका लागि हरेक वर्ष ६ हजारका दरले विद्यालयलाई व्यक्तिगत रुपमा सहयोग गर्ने संस्थाका संस्थापक अध्यक्ष महर्जनले घोषणासमेत गर्नुभयो । संस्थागत रुपमा सहयोग निरञ्न्तर जारी राख्ने सदस्य राजन गौतमले प्रतिबद्धता व्यक्त गर्नु भएको थियो ।