रत्ननगर । वैदेशिक रोजगारको सिलसिलामा युकेमा रहेका नेपालीहरुले खोलेको संस्था क्याट युकेले बिहीबार चेपाङ बालबालिकाका लागि खाद्यान्न सहयोग गरेको छ ।
रत्ननगरमा रहेको गामवेसीको चेपाङ संरक्षण केन्द्र र खैरहनीको करैयामा रहेको अन्तोदय जनजाति आवासीय माविमा अध्ययन गर्ने चेपाङ बालबालिकाको लागि क्याट युकेले खाद्यान्न सहयोग गरेको हो । क्याट युकेका पदाधिकारी तथा सदस्यहरु केन्द्रको विद्यालयमै पुगेर खाद्यान्न सहयोग हस्तान्तरण गरेका थिए ।
क्याट युकेले संरक्षण केन्द्रलाई ३० हजार बराबरको चामल आलु र विद्यालयलाई ५४ हजारको चामल सहयोग गरेको छ । जनजाति आवासीय विद्यालयमा रहेको अक्षयकोषमा रहने गरी क्याट युकेका अध्यक्ष कृष्णप्रसाद गुरूङ र सदस्य कुल अर्यालले १०÷१० हजार रूपैयाँ सहयोग गर्नुभएको थियो । क्याट युकेका अध्यक्ष कृष्णप्रसाद गुरूङले गामवेसीको चेपाङ संरक्षण केन्द्रका अध्यक्ष केपिकिरण शर्मा र जनजाति आवासीय विद्यालयका प्रधानाध्यापक घनश्याम प्रधानलाई सो खाद्यान्न हस्तान्तरण गर्नुभएको थियो । केन्द्रमा भएको कार्यक्रममा केन्द्रका सल्लाहाकार एलबी क्षेत्री र जनजाती आवासीय विद्यालयमा भएको कार्यक्रमको अध्यक्षता व्यवस्थापन समितिका अध्यक्ष दिलबहादुर बोगटीले गर्नुभएको थियो ।
केन्द्रमा भएको कार्यक्रममा क्याट युकेका संस्थापक अध्यक्ष कपिल श्रेष्ठ, क्याट युकेका उपाध्यक्ष बसन्त श्रेष्ठ, पूर्वी चितवन पत्रकार मञ्चका अध्यक्ष होमनाथ सापकोटा तथा विद्यालयमा भएको कार्यक्रममा विद्यालयका प्रधानाध्यापक घनश्याम प्रधानले विद्यालयको प्रतिवेदन प्रस्तुत गर्नुभयो ।
Discussion about this post