कोइराला सरकारबाट स्थानीय चुनावको आशा

भरतपुर । नयाँ सरकार गठनसँगै चितवनका उद्योगी व्यवसायी उत्साहित भएका छन् । निजी क्षेत्रले नयाँ सरकार गठनसँगै लगानीमैत्री वातावरण बन्ने आशा पनि गरेका छन् ।
निजी क्षेत्रले स्थानीय चुनावको आशा पनि कोइरालाको सरकारबाट गरेका छन् । स्थानीय चुनाव सम्पन्न भएपछि विकास निर्माणको कामले तीव्रता पाउने र लगानी गर्न सकिने आशा निजी क्षेत्रको छ ।
उद्योग वाणिज्य सङ्घ चितवनका अध्यक्ष कल्याण जोशीले यो सरकारबाट आफूले ठूलो आशा गरेको बताउनुहुन्छ । राजनीतिक दलले प्रतिबद्धता जनाएअनुसार एक वर्षभित्र संविधान जारी गर्न र स्थानीय निकायको चुनाव गराई आर्थिक समृद्धितर्फ ध्यान केन्द्रित गर्नुपर्ने अध्यक्ष जोशीको भनाइ छ ।
आर्थिक रूपले देश समृद्ध नभएसम्म राजनीतिक स्थिरता नरहने भएकाले अब बन्ने सरकारले निजी क्षेत्रलाई प्रोत्साहन गर्ने खालका नीति ल्याउनुपर्ने जोशीले बताउनुभयो । आर्थिक रूपले देश समृद्ध बनेमात्र रोजगारीको अवसर मिल्ने उहाँको भनाइ थियो ।
दलका नेताले संविधान निर्माणसँगै आर्थिक पाटोलाई पनि अगाडि बढाउनुपर्ने जोशीको सुझाव छ । यस्तै चितवन उद्योग सङ्घका अध्यक्ष कृष्णप्रसाद अधिकारीले कोइरालाको नेतृत्वमा बन्ने सरकारले निजी क्षेत्रलाई थप उत्साहित गर्ने बताउनुभयो । ‘यो सरकारबाट निजी क्षेत्रले धेरै आशा गरेको  छ । आशामा तुषारापात नलागोस्, निजी क्षेत्रको प्रोत्साहन होस्’ उहाँले भन्नुभयो ।
स्वच्छ छवि भएका नेताका रूपमा कोइरालालाई चिनिने हँुदा आर्थिक समृद्धितर्फ विशेष गरी उहाँको ध्यान केन्द्रित हुने अधिकारीको विश्वास छ । संविधान निर्माण गर्न एकताबद्ध भए जस्तै राजनीतिक दलले आर्थिक एजेन्डालाई पनि आत्मसात गर्दै अगाडि बढ्नुपर्ने उहाँको भनाइ छ ।
उद्योग वाणिज्य सङ्घ रत्ननगरका अध्यक्ष दीपककुमार कर्मचार्य तत्काल सरकारलाई पूर्णता दिई संविधान निर्माणतर्फ अघि बढ्नुपर्ने बताउनुहुन्छ ।
चितवनकै क्षेत्र नम्बर ४ बाट निर्वाचित कोइराला प्रधानमन्त्री बनेपछि आफूहरू थप आशावादी बनेको व्यवसायीले जनाएका छन् । प्रधानमन्त्री कोइरालाले आफूले चितवन छाडे पनि उहाँले आफ्ना मतदातालाई सक्दो सहयोग गर्ने बताउनुभएको छ ।