कोरियन कोपिला स्वास्थ्य परीक्षणमा क्रियाशील

बसन्त पराजुली
भरतपुर । उनले नेपाली बोलेको सुन्ने जो कोही उनलाई विदेशी नागरिक हो भनेर विश्वास गर्न गाह्रो पर्छ । मंगोलियन शरीर, गहूँ गोरो वर्ण भएकी उनले आफ्नो नेपाली नाम पनि कोपिला राखेकी छन् ।
‘म नेपाल आएपछि आफैले नेपाली नाम कोपिला राखें’, विगत एक वर्षदेखि भरतपुरमै स्वयम्सेवकका रुपमा कार्यरत ३१ वर्र्षीया ह्यान सोङ जोन आफ्नो नेपाली नामका बारेमा प्रष्ट्याउँदै थप्छिन्, ‘कोरियन भाषामा ह्यानसोङ भनेको फूल हो । त्यसैबाट मैले आफ्नो नाम कोपिला राखें ।’ फूलको कोपिला आफूलाई निकै मन पर्ने उनले बताइन् ।
कोपिला विगत एक वर्षदेखि रक्तसञ्चार केन्द्र भरतपुरमा स्वयम्सेवकका रुपमा काम गर्छिन् । ‘रगत संकलन, यसको गुणस्तर कायम गर्न र रगत संकलन पूर्वप्राथमिक स्वास्थ्य परीक्षण गराउन मैले सहयोग गरिरहेको छु’, कोपिलाले भनिन् । सन् २०१२ को नोमेम्वरमा नेपाल आएकी कोपिला रक्त संकलनलाई व्यवस्थित गराउने काममा क्रियाशील हुन्छिन् । बीएस्सी नर्सिङ अध्ययन पूरा गरेर नेपाल आएकी उनी मौका मिल्ने बित्तिकै भरतपुर अस्पतालमा रहेका स्वास्थ्यकर्मीहरुलाई बिरामीको स्याहारसुसार कसरी गर्ने भन्नेमा पनि प्रशिक्षण दिने गर्छिन् ।
‘रगत संकलनमा सहयोग पु¥याउनु मेरो दैनिक कार्य हो’, उनले भनिन्, ‘यसको अलवा कोरियामा सिकेको नर्सिङ पेसाको ज्ञानलाई मैले यहाँका नर्सिङहरुलाई पनि बाँढिरहेको छु र मैले यहाँबाट पनि धेरै सिकेको छु ।’
नेपाली भाषा सरर बोल्न सक्ने कोरियन युवती कोपिला, रगत संकलनका बेला गरिने परीक्षणहरु रक्तचाप, मधुमेह परीक्षणमा सक्रिय रहन्छिन् । अझै रगतको मात्रा परीक्षण गरिने होमोग्लोविनको परीक्षण पनि उनकै जिम्मामा पर्छ ।
‘उनले सिफारिस गरिन् भनेमात्रै अरुले रगत दिन पाउँछ’, कोपिलाको बारेमा प्रशंसा गर्दै रक्तसञ्चार केन्द्र भरतपुरका प्रमुख रमेशकान्त पौडेलले भने, ‘उनी आएपछि रक्तसंकलन र यसको गुणस्तरमा पनि सहयोग पुगेको छ ।’
नेपाल आएर पोखरा, बन्दिपुर, लुम्बीनी, पाल्पालगाएतका क्षेत्रमा घुमिसकेकी कोपिलालाई नेपालको सवैभन्दा मनपर्ने ठाउँ चितवन नै लाग्छ । ‘यहाँको खानेपानी राम्रो छ । मानिसहरु सहयोगी छन्’ उनले थपिन्, ‘म एक वर्षदेखि चितवनमै रहेका कारणले पनि होला मलाई चितवन मनपर्छ ।’
नेपालीहरुमा रहेको मित्रताको भाव साह्रै मन परेको पनि उनले सुनाइन् ।  कोपिला कोरिया अन्तर्राष्ट्रिय सहयोग नियोग ‘कोइका’मार्फत नेपालमा स्वयम्सेवक हुन आइपुगेकी हुन् । अहिले कोइकाले उनी जस्ता एक हजार आठ सय कोरियनलाई विश्वका ४६ वटा देशमा स्वयम्सेविकाका रुपमा खटाएको छ ।
शिक्षा, स्वास्थ्य, ग्रामीण विकास, सूचना तथा सञ्चार प्रविधि आदि क्षेत्रमा कोरियन स्वयम्सेवकहरु कार्यरत छन् । छोटो समयमा नै आर्थिक विकास गरी विश्वकै आर्थिक रुपमा सवल राष्ट्रहरुमा पर्न सफल कोरियाका स्वयम्सेवकहरु कोरियाले गरेको आर्थिक विकासको अनुभव तथा ज्ञानलाई पनि विकसित देशहरुको सामाजिक तथा आर्थिक विकासमा सहयोग पु¥याई रहेका छन् ।
‘कोरिया पनि ५० वर्ष अघिसम्म आर्थिक रुपमा कमजोर थियो । विश्वकै कमजोर देशमा पथ्र्यो’, कोपिलाले थपिन्, ‘देश गरिव भएका बेला हाम्रा नागरिक अन्यत्र काम गर्न जान्थे, तर अहिले हाम्रो सिप र ज्ञान अरुलाई सिकाउन खटिन्छौँ ।’ कोपिला चितवन आएपछि रक्त सञ्चार केन्द्रमा प्राविधिक सहयोग पनि पुगेको छ ।
कोरियाको किया कम्पनीका इन्जिनियर ब्याङ्टेक जोनकी छोरी ह्यानसोङ अर्थात् कोपिला नेपालबाट फर्किएपछि पनि नेपाल आउने जाने गरी राख्ने प्रतिकृया दिन्छिन् । एक वर्षपछि स्वदेश फर्कदै गरेकी कोपिला थप्छिन्, ‘नेपालका हिमालय सुन्दर छन् । प्राकृत्तिक सुन्दरता राम्रो छ । यहाँ जुन सुकै क्षेत्रमा पनि स्वयम्सेवक भएर काम गर्न चाहनेहरु आउन रमाउँछन् ।’
फोटो क्याप्सनः केही दिनअघि प्रभात महिला बचत तथा ऋण सहकारी संस्थामा संस्थाकी पूर्वअध्यक्ष शान्ति अधिकारीको हेमोग्लोविन परीक्षण गर्दै कोरियन स्वम्सेवक कोपिला ।