डान्सिङ स्टारका प्रतिस्पर्धी छानिए

भरतपुर । चितवन उद्योग संघको आयोजनामा फागुन १ गतेदेखि हुन लागेको राष्ट्रिय औद्योगिक प्रदर्शनी–२०७० अन्तर्गतको डान्सिङ स्टारको लागि फाइनल प्रतिस्पर्धीको टुङ्गो लागेको छ । गैंडाकोटस्थित अक्सफोर्ड कलेज अफ इञ्जिनियरिङ एण्ड म्यानेजमेन्टमा तेस्रो अडिसन सम्पन्न भएपछि फाइनल प्रतिस्पर्धीको टुङ्गो लागेको हो ।
तीन स्थानमा गरिएको अडिसनबाट २५ जना विद्यार्थी फाइनल प्रतिस्पर्धाका लागि छनौट भएको कला तथा संस्कृति व्यवस्थापन समितिका संयोजक युवराज श्रेष्ठले जानकारी दिए ।
अडिसन राउण्डमा सोही कलेजका एक छात्रसहित १८ जना विद्यार्थीले सहभागिता जनाएका थिए । जसबाट ८ जना विद्यार्थी फाइनल प्रतिस्पर्धाका लागि छनौट भएको कार्यक्रमका निर्णायक संयोजक युवराज पौडेलले जानकारी दिए । छनौट हुनेहरुमा समा श्रेष्ठ, सूचना अर्याल, सविना थापा, रेविना गिरी, निशा कँडेल, सरिता कालिकोटी, नेहाल जोशी र आशा थनेत रहेका छन् ।
कार्यक्रम कलेजका प्राचार्य हरिप्रसाद भण्डारीको प्रमुख आतिथ्यता एवं कला तथा संस्कृति व्यवस्थापन समितिका संयोजक युवराज श्रेष्ठको अध्यक्षतामा सम्पन्न भएको थियो ।
यसैबीच, राष्ट्रिय औद्योगिक प्रदर्शनीको तयारी लगभग पूरा भइसकेको छ । मूल आयोजक समितिका संयोजक कृष्णप्रसाद अधिकारीले प्रदर्शनीमा ३०० स्टल रहने र सबै स्टलको तयारी पूरा भइसकेको बताए । यसपटक अष्ट्रिचसमेत राखिने प्रचार–प्रसार समितिका संयोजक एवम् संघका महासचिव राजु पौडेलले जानकारी दिए । शोभायात्राका लागि सम्पूर्ण तयारी पूरा भइसकेको सचिवालय तथा शोभा यात्रा व्यवस्थापन समितिका संयोजक युवराज सिंखडाले जानकारी दिए ।