दशगथा क्षेत्रमा एसएसबीद्वारा भौतिक संरचना निर्माण

परासी । नेपाल–भारत सिमानाअन्तर्गत पर्ने नवलपरासीको महेशपुर नाकामा रहेको दशगजा क्षेत्रमा भारतीय सुरक्षा बल (एसएसबी) ले भौतिक संरचना निर्माण गरेको छ ।
सिमानाका लागि छाडिएको दशगजा क्षेत्रमध्येको करिब चार मिटर जग्गामा एसएसबीले आफ्नो कार्यालयको पर्खाल र सेन्ट्री बस्ने स्थान निर्माण गरेको छ ।
नेपालको हरपुर गाविसको महेशपुर नाका भारत महाराजगञ्ज जिल्लाको ठूठिबारी सिमानासँग जोडिएको छ । वर्षांै अघिदेखि भारत प्रवेशका लागि निर्माण गरिएको प्रमुखद्वार र भारतले निर्माण गरेका अन्य भौतिक संरचनाको क्षेत्रभन्दा करिब चार मिटरअघि बढेर एसएसबीले पर्खाल र सुरक्षाकर्मी बस्ने सेन्ट्री निर्माण गरेको हो ।
दशगजा क्षेत्रमा भौतिक संरचना निर्माण गरेकोबारे सम्बन्धित विभागलाई जानकारी गराइएको प्रमुख जिल्ला अधिकारी केशवराज घिमिरेले बताउनुभयो ।
भारतले आफ्नो देशमा निर्माण गरेका पहिलाका भौतिक संरचनाभन्दा केही अगाडि बढेर एसएसबीले पर्खाल बनाएको देखिएको उहाँको भनाइ छ ।
पर्खाल निर्माणबारे दुई देशको बैठकमा कुरा उठेको र अब आइन्दा सो स्थानभन्दा अगाडि नबढ्न एसएसबीलाई जानकारी गराउने सहमति भएको जिल्ला प्रशासन कार्यालय नवलपरासीले जनाएको छ । रासस