एमाओवादी प्रतिपक्षमा बस्नेः प्रचण्ड

भरतपुर । एकीकृत नेकपा माओवादीका अध्यक्ष पुष्पकमल दाहाल ‘प्रचण्ड’ले एमाओवादीले कांग्रेस र एमाले रहेको सहमतिको सरकार चाहेको बताएका छन् । प्रचण्डले कांग्रेस र एमालेबीच सहमति होस् भन्ने आफूहरुको चाहना भएको भन्दै साँझसम्ममा उनीहरुबीच सहमति बनेर सरकार बन्ने बताए ।
आइतबार एक कार्यक्रममा सहभागी हुन चितवन आइपुगेका प्रचण्डले भरतपुर विमानस्थलमा पत्रकारहरुसँग कुरा गर्दै सहमति नभए के गर्ने भन्ने विषयमा छलफल गर्ने बताए ।
अहिलेसम्म संकट नआएको भन्दै सरकार गठनका विषयमा आफूले नसोचेको समेत उनले बताए । एमाओवादीको आधिकारिक निर्णय प्रतिपक्षमा बस्ने भएको भन्दै संसदमा प्रधानमन्त्रीका पक्षमा कसैलाई पनि भोट नहाल्ने बताए । ‘कसले के भन्यो भन्दा पनि हाम्रो आधिकारिक धारणा भनेको प्रतिपक्षमा बस्ने हो’, एमाओवादी नेता टोपबहादुर रायमाझीले ओली नेतृत्वलाई समर्थन गर्नेबारे दिएको अभिव्यक्तिलाई लक्षित गर्दै सोधिएको प्रश्नमा उनले भने, ‘हामीले कसैको पक्षमा पनि मतदान गर्दैनौँ ।’
संविधान निर्माणका लागि आफूले असल प्रतिपक्षको भूमिका निभाउने भन्दै उनले त्यसका लागि एमाओवादीले संविधानसभाको अध्यक्ष तथा सभामुख पाउनुपर्ने बताए । सरकारमा नजाने तपाईँहरुलाई कांग्रेस, एमालेले सभामुख दिन्छन् भन्ने के ग्यारेण्टी भन्ने पत्रकारको प्रश्नमा उनले भने, ‘दिन्छन, दिँदैनन् उनीहरुको नै कुरो हो, तर पनि हामी प्रतिपक्षमा बसेर असल संविधान बनाउन प्रयत्न गर्छौँ ।’
नयाँ जनादेशअनुसार राष्ट्रपतिको निर्वाचन गर्नुपर्ने बताउँदै प्रचण्डले यसमा कांग्रेस पनि जुन कुनै अवस्थामा आइपुग्ने बताए । ‘एमाले र कांग्रेसबीच यही विषयमा विवाद हो, हामी राष्ट्रपति र उपराष्ट्रपतिको निर्वाचन हुनुपर्छ भन्नेमा छौँ’, अध्यक्ष प्रचण्डले भने, ‘काँग्रेस पनि यस कुरामा नजिक आइपुगेको छ ।’
‘शनिबारको वार्तामा कांग्रेसबाट अहिलेकै राष्ट्रपतिलाई संशोधन गरेर अगाडि बढौँ भन्ने प्रस्ताव राखेको छ’, उनले थपे, ‘पहिले राष्ट्रपतिको विषयमा कुरा नै उठाउन हुन्न भन्नेले यस्तो भन्नु पनि ठूलो कुरा हो ।’ कांग्रेस पनि राष्ट्रपति र उपराष्ट्रपतिको विषयमा छलफल गर्न तयार रहेको भनाइ थियो ।