गोरखा । एकीकृत नेकपा (माओवादी) का नेता एवम् पूर्व प्रधानमन्त्री डा बाबुराम भट्टराईले नयाँ संविधानसभा निर्वाचन भएपछि पहिले राष्ट्रपति, उपराष्ट्रपतिको निर्वाचन हुनुपर्ने बताउनुभएको छ ।
राष्ट्रपतिको निर्वाचनपछि सभामुख, उपसभामुख, प्रधानमन्त्री चयन हुनुपर्ने उहाँले बताउनुभयो । सामान्य जनताले पनि बुझ्ने कुरालाई विभिन्न बहानाबाजी बनाउनु कसैका लागि पनि हित नहुने उहाँले बताउनुभयो ।
गोरखाको भुम्लिचोकस्थित तोमनडाँडा माविको रजत महोत्सव समापन कार्यक्रमलाई सम्बोधन गर्नुहुँदै उहाँले संविधानका धारा ८० (६) मा स्पष्टरुपले नयाँ राष्ट्रपति चयन गर्नुपर्ने उल्लेख गरिएको छ भन्नुभयो ।
उहाँले भन्नुययो, “राष्ट्रपतिको निर्वाचन नहुनु भनेको लोकतन्त्र नमान्नु हो । सबैभन्दा पहिले राष्ट्रपति र उपराष्ट्रपतिको निर्वाचन गरेर लोकतान्त्रिक प्रक्रियालाई अगाडि बढाउनु पर्दछ ।”
देश परिवर्तनको बाटोबाट अगाडि बढिरहेको बताउँदै उहाँले भन्नुभयो, “नयाँ ढङ्गलले सङ्गठित भई अघि बढ्नुपर्दछ, परिवर्तनलाई संस्थागत गर्नुपर्दछ । एमाओवादी पार्टी बलिदानीबाट आएको हुनाले जहिल्यै पनि परिवर्तनको पक्षमा रहन्छ ।” रासस
Discussion about this post