सर्वपक्षीय राजनीतिक सभाको पक्षमा नेकपा माओवादी

काठमाडौँ । नेकपा –माओवादीले नयाँ परिस्थितिमा नयाँ राष्ट्रिय सहमतिको निर्माणका लागि सर्वपक्षीय राजनीतिक सभाको गठन गरी  राजनीतिक निकास निकाल्नुपर्ने कार्यनीतिप्रति पार्टी दृढ रहेको जनाएको छ ।
पार्टीको शनिबार सम्पन्न चारदिने पोलिटब्युरो बैठकको निर्णय सार्वजनिक गर्न सोमबार यहाँ आयोजित पत्रकार सम्मेलनमा  पार्टी अध्यक्ष मोहन वैद्यले मुलुकमा द्वन्द्व समाधान गर्ने हो भने जनयुद्वबाट आएको हिस्सालाई पनि बाहिर राखेर समाधान ननिस्कने हुनाले माओवादीलाई साथ लिएर अघि बढ्नुपर्ने बताउनुभयो । उहाँले त्यसको लागि नयाँ खालको राजनीतिक सहमतिको खाँचो औँल्याउनुभयो ।
उहाँले माओवादीले उठाएका विषयलाई गम्भिरपूर्वक लिएर हेटाँैडा महाधिवेशनले लिएको कार्यदिशा र निर्णयलगायतका विगतका कमी कमजोरी सच्चाएर आएमा एनेकपा (माओवादी)सँग एकता सम्भावना रहे पनि तत्काल भने त्यो सम्भव नभएको बताउनुभयो ।
बैठकले जनआन्दोलनको सञ्चालनका लागि पार्टी र जनवर्गीय मोर्चाहरू सम्मिलित संयुक्त जनसमितिको निर्माण गर्ने निर्णय भएको जानकारी दिएको छ ।
पोलिटब्युरो बैठकले सङ्गठित अपराध, सुपर्दगी, सम्पति शुद्वीकरण, कानुनी सहायतालगायतका राष्ट्रघाती तथा जनविरोधी अध्यादेश  व्यवस्थापिका–संसदमा प्रस्तुत गरिएकोमा त्यसको विरोधका लागि कार्यक्रम गर्ने निचोड निकालेको छ ।
देशको राष्ट्रियता, स्वाधिनता, सार्वभौमिकताको दृष्टिले गम्भीर बन्दै गएका अरुण तेस्रो, माथिल्लो कर्णालीसहितका बृहत् जलविद्युत् आयोजनाका विरोध, अध्यागमन तथा सीमा अतिक्रमण समस्या तथा भ्रष्टाचार, वेरोजगारी, महँगी तस्करीलगायतका विषयलाई केन्द्रमा राखेर विरोधका कार्यक्रम गर्ने निर्णय भएको पार्टीका अध्यक्ष वैद्य र महासचिव रामबहादुर थापा बादलद्वारा संयुक्तरुपमा हस्ताक्षरित विज्ञप्तिमा जनाइएको छ ।
सो पार्टीले मजदुर, किसान, महिला, जनजाति, मधेसी, पिछडिएका क्षेत्र र मुस्लिम समुदायसहितका जनताका हक अधिकारको स्थापनासहित जनताको सङ्घीय गणतन्त्रमा आधारित संविधानको पक्षमा जनाधार तयार पार्ने भएको छ ।  त्यस्तै नेकपा एकीकृत र क्रान्तिकारी कम्युनिस्ट केन्द्र नेपालसँग पार्टी  एकताका लागि सकारात्मकरुपमा संवाद अघि बढिरहेको जानकारी दिइएको छ । रासस