रत्ननगर । चितवनको सौराहामा आइतबार खाद्य सुरक्षा तथा होटल स्तरीकरणसम्बन्धी अन्तक्र्रिया कार्यक्रम गरिएको छ । सौराहाका होटल तथा रेस्टुरेन्टका खानामा सुधार, सरसफाइ र होटल स्तरीकरणका विषयमा छलफल गर्न कार्यक्रम आयोजना गरिएको हो ।
खाद्य प्रविधि तथा गुण नियन्त्रण डिभिजन कार्यालय चितवनले आयोजना गरेको कार्यक्रममा होटल स्तरीकरण तथा लोगो वितरणका लागि स्थानीयस्तरमा समिति गठन गरिएको छ ।
कार्यक्रमका प्रमुख अतिथि रत्ननगर नगरपालिकाका मेयर नारायण वनले पर्यटन क्षेत्र भएको हुँदा खानेकुरामा सम्झौता गर्न नहुने बताए । रूमको पैसा थोरै लिने र त्यसको सट्टा खानामा चर्को मूल्य लिने प्रवृत्तिको अन्त्य हुनुपर्ने भन्दै मेयर वनले पर्यटकले नाक खुम्च्याउने वातावरण बनाउन नहुने बताए ।
सहायक प्रमुख जिल्ला अधिकारी जनकराज पन्तले खाद्य सुरक्षाको विषयमा सौराहाका व्यवसायीहरु गम्भीर हुन जरूरी रहेको बताए । उनले पर्यटकलाई गर्नुपर्ने व्यवहार र प्रदान गर्ने सेवाको विषयमा सौराहामा व्यवसायीहरुले गर्नुपर्ने काम धेरै रहेको बताए । उनले सेवा प्रदान गर्न पर्यटकबाट स्यावासी पाउने वातावरण सौराहाका होटलहरुमा हुनुपर्ने बताए ।
खाद्य प्रविधि तथा गुण नियन्त्रण डिभिजन कार्यालय चितवनका प्रमुख विकी राउतले खाद्य सुरक्षाका लागि उपभोक्ताले अपनाउनुपर्ने सजगता होटलको स्तरीकरण र स्टिकर वितरणको विषयमा कार्यपत्र प्रस्तुत गरेका थिए ।
खाद्य प्रविधि तथा गुण नियन्त्रण डिभिजन कार्यालय चितवनका प्रमुख राउतको अध्यक्षतामा भएको कार्यक्रममा क्षेत्रीय होटल संघका प्रथम उपाध्यक्ष दीपक भट्टराई, खाद्य अनुसन्धान अधिकृत आकाश काफ्लेलगायतले मन्तव्य राखेका थिए ।
