भरतपुर । कृषि क्षेत्रको विकासमा सूचना प्रविधिले निकै टेवा पुग्ने प्रदेश ३ का भूमि व्यवस्थापन सहकारी तथा कृषि मन्त्री दावा दोर्जे लामाले बताएका छन् ।
भरतपुरमा आयोजित प्रभु पे चौँथो क्यान इन्फोटेक मेला उद्घाटन गर्दै मन्त्री लामाले अब प्रविधिको प्रयोग गरी सामूहिक खेती गर्ने प्रणालीको विकास गर्नुपर्ने बताए । नेपाल कृषिप्रधान देश भएकाले प्रविधिमार्फत कृषि तथा फलफूलको विकास गरी देशलाई कृषिजन्य उत्पादनमा आत्मनिर्भर बनाउनुपर्ने उनको भनाइ थियो ।
झट्ट हेर्दा तालमेल नमिलेजस्तो देखिए पनि सबैभन्दा बढी प्रविधिको प्रयोग कृषिमा आवश्यक रहेको र कृषिलाई प्रविधिसँग जोडेर क्रान्ति गर्न आवश्यक रहेको उनले बताए । प्रदेश सरकारले सिन्धुलीमा १२१ बिघा क्षेत्रफल जमिनमा सामूहिक खेती गरी प्रविधि र कृषिको तालमेल गरिरहेको उनले जानकारी दिए ।
कार्यक्रममा कम्प्युटर एसोसिएसन नेपाल महासंघका केन्द्रीय अध्यक्ष हेमन्त चौरासियाले प्रविधिको ज्ञानमात्र राखेर नभई यसको प्रयोग गरेर फाइदा लिनुपर्ने बताए ।
उद्योग वाणिज्य संघ–चितवनका अध्यक्ष सहनलाल प्रधानले कृषि, शिक्षा, स्वास्थ्य र पर्यटनको विकासले नै देशमा समृद्धि आउने भएकाले त्यसको विकासका लागि प्रविधि अनिवार्य रहेको उल्लेख गरे ।
चितवन उद्योग संघका वरिष्ठ उपाध्यक्ष राजु पौडेलले उद्योगी व्यवसायीले प्रविधिको उचित प्रयोग गरी व्यवसाय गर्न सके व्यापार घाटा कम हुने बताउँदै प्रविधिको प्रयोग गरी आफ्नो व्यवसायबाट बढी मुनाफा आर्जन गर्न आग्रह गरे ।
कार्यक्रममा अक्स्फोर्ड कलेजका प्रिन्सिपल हरि भण्डारी, महासंघ प्रदेश नं ५ का अध्यक्ष सुदीप शर्मा, केन्द्रीय उपाध्यक्ष नवराज कुँवरलगायतले मन्तव्य राखेका थिए ।
माघ २९ गतेसम्म सञ्चालन हुने मेलाको पूर्वसन्ध्यामा निजी तथा सामुदायिक विद्यालयका कम्प्युटर शिक्षकलाई कम्प्युटरसम्बन्धी तालिम, आइडिया हन्टलगायतका केही कार्यक्रम सम्पन्न भइसकेको संस्थाका उपाध्यक्ष विष्णु लामिछानेले बताए ।
मेलामा सूचना प्रविधिका साथै हार्डवेयर (कम्प्युटर, ल्यापटप, प्रिन्टर, नेटवर्किङ सामग्रीहरु) सफ्टवेयर, सुरक्षासम्बन्धी सामग्रीहरु, मोबाइल, स्मार्ट टिभीलगायतका ८० बढी स्टल रहेको मेला मूल समितिका संयोजक एवम् संघका शाखा अध्यक्ष भानु शर्माले बताए ।
करिब डेढ लाख जनाले अवलोकन गर्ने र ८० लाख रूपैयाँबराबरको कारोबार हुने मेला आयोजकको लक्ष्य छ ।
