रत्ननगर खानेपानी नाफामा

रत्ननगर । रत्ननगर खानेपानी तथा सरसफाई उपभोक्ता संस्थाले आर्थिक वर्ष २०६९÷७० मा ६० लाखभन्दा बढी नाफा गरेको छ । आर्थिक वर्ष २०६९÷७० मा ६० लाख ३३ हजार ७ सय एक रुपैयाँ नाफा गरेको संस्थाको शुक्रबार सम्पन्न चौथो वार्षिक साधारण सभामा जानकारी गराइएको हो ।
गत आर्थिक वर्षमा २६ लाख आम्दानी गरेको संस्थाले यसवर्ष दोब्बरभन्दा बढी नाफा गरेको संस्थाका कोषाध्यक्ष हरिप्रसाद पाण्डेले जानकारी दिनुभयो । गत वर्ष ४३ लाख ९९ हजार न्यून ह्रास रहेको संस्थाको यस वर्ष भने ४३ लाख ३ हजार न्यून ह्रास रहेको छ । साथै संस्थाले आर्थिक वर्ष २०७०÷७१ मा १ करोड ९० लाख ७३ हजार ५ सय आम्दानी गर्ने अनुमान गरेको छ ।
नेकपा एमाले चितवन क्षेत्र नं. २ बाट समानुपातिकतर्फ निर्वाचित संविधान सभाका सदस्य  काशीनाथ अधिकारीको प्रमुख आतिथ्यमा भएको कार्यक्रममा संस्थाका अध्यक्ष यादव पाठकले भावी कार्यक्रम तथा प्रगति प्रतिवेदन र कोषाध्यक्ष हरिप्रसाद पाण्डेले आर्थिक प्रतिवेदन प्रस्तुत गर्नु भएको थियो । कार्यक्रममा डिभिजन खानेपानी तथा सरसफाई कार्यालय भरतपुरका ज्ञानुप्रसाद पौडेल, पर्सा शहरी खानेपानी तथा सरसफाई उपभोक्ता संस्थाका अध्यक्ष शेरमान तामाङ लगायतले बोल्नु भएको थियो ।