चेपाङ अगुवा रहेनन्

भरतपुर । नेपालको अल्प संख्यक आदिवासी जनजाति चेपाङ समुदायका अगुवा यमन चेपाङको निधन भएको छ । नेपाल आदिवासी जनजाति महासंघका सचिवसमेत रहेका यमन लोकगायक पनि थिए । चितवन घर भएका यमनको बिहीबार काठमाडौंमा निधन भएको नेपाल आदिवासी जनजाति महासंघका अध्यक्ष नरेन्द्र कुमालले जानकारी गराएका छन् ।
यमन युरिक एसिडको समस्याले पिरोलिएका थिए । उनको कलेजो र मृगौलामा समस्या देखिएको थियो । नेपालको अल्पसंख्यक चेपाङ समुदायका जागरणका लागि खोलिएको संस्था नेपाल चेपाङ संघको केन्द्र र जिल्लाको समेत नेतृत्व सम्हालेका थिए । उनी चेपाङ संघका केन्द्रीय महासचिव पनि हुन् ।
‘गरौं चिनाजान’ लगायतका नेपाली लोकदोहोरी एल्बम निकालेका यमनले चेपाङ भाषामा पनि गीत गाएका छन् । काठमाडौँंबाट चितवन लोथर ल्याएर उनको पार्थिव शरीरलाई  अन्तिम श्रद्धाञ्जली अर्पण गरिएको चेपाङ संघ चितवनका पुर्व जिल्ला अध्यक्ष गोविन्द चेपाङले बताए ।