दर्ता हुँदैनन् मानव बेचबिखनका घटना

भरतपुर । नेपालमा मानव बेचबिखन तथा अवैध ओसारपसारका घटनाहरु बढे पनि यस्ता घटनाको उजुरी दर्ता नै नहुने गरेको कानुन व्यवसायीहरुले बताएका छन् ।
जागिरको प्रलोभनमा होस् वा वैदेशिक रोजगारको आश्वासनमा मानव बेचबिखन भएको घटना आएपनि प्रहरीले यस्ता घटनाको उजुरी नै दर्ता गर्न नमान्ने गरेको सरोकारवालाहरुले बताएका छन् ।
कानुन अन्वेषण तथा स्रोत विकास केन्द्र (सेलर्ड) को आयोजनामा बिहीबारदेखि चितवनमा सुरू भएको प्रशिक्षण कार्यक्रममा कानुन व्यवसायी फूलमाया रानाभाटले कानुनी धारा जानकारी गराउँदा समेत दर्ता नहुने गरेको दुखेसो पोख्नुभयो ।
दैनिक रूपमा यस्ता घटना घटेपनि वर्षाैसम्म चितवनमा समेत ३, ४ भन्दा बढी मुद्दा अगाडि बढ्न नसकेको उहाँले बताउनुभयो । प्रहरीमा समेत यस्ता मुद्दा न्यून छ । कतिपय स्वयं पीडितहरुलाई डर र त्रासमा पार्ने गरेको तथा कतिपय सरकारी अधिकारीहरुकै साथ नपाएको सम्बद्ध व्यक्तिहरुले बताएका छन् ।
सेलर्डको आयोजनामा बिहीबारदेखि चितवनमा मानव बेचबिखन तथा   ओसारपसार अपराधविरूद्ध सरोकारवालाहरुका लागि अवधारणागत स्पष्टतासम्बन्धी तीनदिने प्रशिक्षण सुरू भएको छ । प्रशिक्षणका क्रममा कानुनका प्राध्यापक एवम् सेलर्डका सचिव अञ्जनकुमार दाहालले नेपालमा हरेक ५ मानिसमध्ये तीन जनाले विदेश जान चाहाने गरेको तथ्याङ्क प्रस्तुत गर्दै यहीँबाट बेचबिखन सुरू हुने बताउनुभयो ।
उहाँले आर्थिक, सामाजिक, राजनीतिक फितलो कानुनलगायत तत्वले मानिसलाई बेचबिखनमा उन्मुख गराएको बताउनुभयो । उहाँले ती व्यक्तिको आवश्यकतालाई मध्येनजर गरी गिरोहहरु संगठित रुपमा सक्रिय हुने गरेको बताउनुभयो ।
कानुनको अनविज्ञताका कारण पनि अर्काे समस्या निम्तिरहेको सेलर्डका कार्यक्रम व्यवस्थापक राममणि गौतमले बताउनुभयो । उहाँले नेपालको प्रहरी संयन्त्रमा भएका अनुसन्धान प्रक्रियाभन्दा पनि आधुनिक प्रविधिका साथ बेचबिखनमा सहभागी हुने गरेको बताउनुभयो ।
सरकारले यसलाई संगठित अपराधको रुपमा परिभाषा गरेको उल्लेख गर्दै गौतमले मानव बेचबिखन, मानव तस्करी तथा ओसारपसारका विषयहरुमा समेत ज्ञान राख्नुपर्नेमा जोड दिनुभयो । ज्ञानकै अभावमा पनि कतिपय अभियुक्तविरूद्ध मुद्दा अगाडि बढ्न नसकेको उहाँको भनाइ छ ।