त्रिवेणी मेलामा भक्तजनको घुइँचो

कावासोती । ऐतिहासिक एवम् धार्मिकस्थल त्रिवेणीधाममा बिहीबार बिहानैदेखि माघी औंशी मेलामा आउनेको घुइँचो लागेको छ ।
नारायणी, स्वर्णभद्रा, पूर्णभद्रा नदीको सङ्गम स्थलको रूपमा रहेको त्रिवेणीमा मोक्ष प्राप्तिका लागि माघे औंशीमा स्नान गर्न आउनेको घुइँचो हुने गरेको हो ।
यसवर्ष नेपालका भन्दा भारतका तीर्थालुहरू त्रिवेणीमा बढी आएका छन् । रूपन्देही, चितवन, पाल्पा, स्याङ्जा, धनुषालगायका जिल्लाबाट तिर्थालुहरू यहाँ आउने गरेका हुन् । बर्सेनि आउने तीर्थालुको व्यवस्थापनका लागि त्रिवेणी गाविसले  मेलाको आयोजना गर्ने गरेको गाविस सचिव गोपालप्रसाद भट्टराईले बताउनुभयो ।
सीता पाताल गएको र लवकुशको जन्मभूमि भएकाले त्रिवेणीलाई हिन्दू धर्मालम्बीहरूले महत्वका साथ हेर्ने गर्दछन् । त्रिवेणीधाममा आउने तीर्थालुको व्यवस्थापनका लागि गण्डक ब्यारेजदेखि गजेन्द्रमोक्षधामसम्म लाइन लागेको छ ।
सुरक्षा व्यवस्थाका निम्ति सशस्त्र प्रहरीहरू खटाइएको प्रमुख जिल्ला अधिकारी केशवराज घिमिरेले बताउनुभयो । मेला व्यवस्थापनका लागि स्थानीयस्तरमा स्वयम्सेवकहरू खटाइएको छ । बाल्मिकी आश्रम आउ÷जाउ गर्न डुङ्गाको व्यवस्थापन गरिएको छ । नारायणी नदी पारी चितवन राष्ट्रिय निकुञ्जमा रहेको आश्रममा पुग्ने भक्तजनहरूका लागि डुङ्गाको व्यवस्था गरिएको छ
भगवान विष्णुले हात्ती पानी खान जाँदा गोहीले आक्रमण गर्दा सुदर्शन चक्र प्रहार गरी हात्तीलाई मोक्ष दिलाएको पुराणहरूमा वर्णित छ । यस वर्ष चार लाख तीर्थालुहरू त्रिवेणीमा आएको जिल्ला प्रशासन कार्यालयका प्रशासकीय अधिकृत ओमप्रसाद पाण्डेले जानकारी दिनुभयो ।
वाल्मीकि आश्रम पुग्न भारतीय भूमि प्रयोग गर्नुपर्ने भए पनि भारतीय सीमा सुरक्षा बल (एसएसबी) ले जान नदिएपछि हजारौं तीर्थालु बाल्मिकी आश्रम पुग्न सकेका छैनन् । सवारी प्रयोग गर्न नपाएपछि डुङ्गाको प्रयोग गर्ने गरिएको  छ ।