रत्ननगर । पूर्वी चितवन ह्वीलचियर खेलकुद समितिमा आबद्ध खेलाडीहरुलाई सोमबार खेलकुदका सामग्री सहयोग गरिएको छ । इनर ह्वील क्लब अफ नारायणीले समितिमा आबद्ध १५ जना खेलाडीलाई खेलकुदका सामग्री सहयोग गरेको हो ।
क्लबकी सदस्य कमला आले र उनका श्रीमान् नन्दु आलेको आर्थिक सहयोगमा क्लबले खेलाडीहरुलाई पोसाक र २ वटा बास्केट बल सहयोग गरेको हो । पञ्चकन्या विद्या मन्दिर रत्ननगरमा आयोजित कार्यक्रममा रत्ननगर वडा नं २ का वडा अध्यक्ष तिलकराज शर्मा र क्लबकी अध्यक्ष कल्पना थपलियाले सो सामग्री खेलाडीलाई हस्तान्तरण गरेका थिए ।
पूर्वी चितवन ह्वीलचियर खेलकुद समितिका संयोजक निस्वार्थ श्रेष्ठले बौद्धिक विकासका लागि ह्वीलचियर प्रयोगकर्ताहरुबीच खेलकुदका प्रतियोगिताहरु गर्दै आएको र त्यसका लागि आवश्यक सामग्री क्लबबाट सहयोग पाएर सहज भएको बताए ।
समितिका अध्यक्ष राजकुमार रानामगर, क्लबकी संस्थापक अध्यक्ष विनिता भट्टराई, उपाध्यक्ष अञ्जना श्रेष्ठ, सचिव प्रमिला रानाभाटलगायतको सहभागिता रहेको थियो भने क्लबकी अध्यक्ष थपलियाको अध्यक्षतामा कार्यक्रम भएको थियो ।
