भरतपुर । शनिबार भरतपुरमा दुई जना स्रष्टा पुरस्कृत भएका छन् । साहित्य संगम चितवनले प्रदान गर्दै आएको ‘श्रीप्रसाद रेणुका रेग्मी स्मृति पुरस्कार’बाट लेखक रेशम ‘विरही’ र प्रगतिशील लेखक संघ चितवनले प्रदान गर्दै आएको ‘गणेश तथा हस्तकुमारी लक्ष्मदेवी पन्त स्मृति पुरस्कार’बाट कवि मुक्तान थेवालाई पुरस्कृत गरिएको हो ।
दुवै पुरस्कार ५० हजार रूपैयाँको अक्षयकोषबाट आएको ब्याजबाट उपलब्ध गराएको साहित्य संगम चितवनका अध्यक्ष प्रकाश चापागाईंले जानकारी दिए । लेखक तथा साहित्यकार विरहीलाई नेपाली साहित्यको निरन्तरताको आधारमा पुरस्कृत गरिएको हो भने कवि थेवा भने अखण्ड अलाप नामक कवितासंग्रहलाई पुरस्कृत गरिएको हो ।
चितवन निवासी विरहीको देब्रे आँखा (निबन्ध), प्रेमदासको डायरी (उपन्यास), थालथालमा सपना (कवितासंग्रह) चर्चित कृति हुन् । यीबाहेक आधा दर्जन अन्य कृतिसमेत प्रकाशित छन् ।
मकवानपुरका कवि थेवा प्रगतिवादी लेखकको रुपमा परिचित कवि हुन् । उनको ‘अखण्ड अलाप’ कवितासंग्रह र आफर (संयुक्त लेखन) प्रकाशित छन् ।
कार्यक्रममा लेखक सरिता तिवारी, समीक्षक उदय अधिकारी, पुरस्कार दाता अमृत पन्त र ध्रुबकिरण रेग्मी तथा पुरस्कृत स्रष्टा विरही र थेवाले मन्तव्य राखेका थिए । साहित्य संगम चितवनका उपाध्यक्ष बाबुराम पाण्डेले स्वागत मन्तव्य दिएको कार्यक्रममा कवि ईन्द्र रेग्मी प्रमुख अतिथि थिए ।
