माडीमा इलाका प्रशासन राख्न माग

धेरैको निकुञ्ज प्रशासनप्रति गुनासो  
माडी । प्रमुख जिल्ला अधिकारी नरेन्द्रराज शर्मासहित अधिकांश कार्यालय प्रमुखहरु मंगलबार दिनभर माडीमा बसे । चितवन क्षेत्र ५ अन्तर्गत पर्ने माडीका चार गाविस र जगतपुर तथा शुक्रनगर गाविसका सेवाग्राहीहरुका समस्या सुने ।
प्रमुख जिल्ला अधिकारी शर्मा संयोजक रहेको भ्रष्टाचारविरूद्धको स्थानीय समितिको समन्वयमा चितवन जिल्ला विकास समितिले आयोजना गरेको सार्वजनिक सुनुवाइ कार्यक्रममा धेरैका गुनासो निकुञ्ज प्रशासनप्रति नै रह्यो ।
‘घरबाट सदरमुकाम जान आउन प¥यो । निकुञ्ज छिर्ने बेलामा सेनाको पोष्टमा टिकट काट्नपर्छ । एउटा देशको मान्छे अर्को देश छिर्न लागेजस्तो नाम ठेगाना लेखाउनुपर्छ’ माडी गर्दी गाविस वडा ७ का देवेन्द्र पौडेलले भने । माडी जान आउन निकुञ्ज छिर्ने बेलामा मोटरसाइकललगायतका सवारी साधनको विवरण र शुल्क बुझाउनुपर्ने प्रावधान छ ।
‘छोराछोरी भरतपुर बसेर पढ्छन् । पढ्ने टेबल र बस्ने पुराना मेचसमेत लैजान पाइँदैन’ पौडेलको थप भनाइ थियो । राति १० बजे पछाडि र बिहान ६ बजे अगाडि निकुञ्ज छिर्न पाइँदैन । यो समयमा पाँच १० मिनेट तलमाथि भए पनि निकुञ्ज छिर्न नदिने परिपाटीले हैरानी भएको उनले बताए ।
कुखुराजस्तो संवेदनशील पंक्षी बोकेर जाने गाडीसमेत तोकिएको समयभन्दा दुई चार मिनेट ढिलो भए छिर्न रोकेको उनको भनाइ थियो । माडीमा पर्यटनको विकास हुन सक्ने सम्भावना पनि निकुञ्जका कारण पछाडि धकेलिएको नेकपा (एमाले)का नेता श्याम विष्टको भनाइ थियो ।
निकुञ्ज घुमेर जगतपुर या मेघौली, भरतपुर र सौराहामा बास बस्न गए एक दिनको प्रवेश शुल्क तिरे पुग्नेमा माडी बस्दा दुई दिनको प्रवेश शुल्क तिर्नुपर्ने बाध्यता रहेको विष्टले बताए । यस्तो भएका कारण पर्यटन र होटल व्यवसाय फष्टाउन नसक्ने उनले बताए ।
निकुञ्जका जनावरबाट पीडा बेहोर्ने माडीवासी भए पनि त्यसबाट हुने फाइदा उपभोग गर्ने अरू रहेको माडीवासीको कथन थियो । ‘हात्ती आउँछ यहीँ कै मान्छे मार्छ । बाघले यहीँ दुःख दिन्छ । अन्यत्र चोरी सिकारीले दुर्लभ जनावर मारेर तस्करी गरेका छन् । माडीमा चोरी तस्करी पनि हुँदैन, तर अन्यत्र पर्यटन विकासका लागि ‘होमस्टे’ बनाइन्छ, हामीलाई केही छैन’ एक माडीवासीको गुनासो थियो ।
गर्दी वडा नं. ९ का यमकान्त भुषालले जनवारले जस्तै बाढीले पनि माडीलाई पीडा दिने गरेको बताए । शुक्रनगर गाविसका प्रजापति सापकोटाले एक जना गाविस सचिवले अरू गाविस पनि हेर्नुपर्ने बाध्यताका कारण स्थानीयले दुुःख पाएको बताए । ‘घरको १० वटा काम छाडेर गाविस कार्यालय आयो । गाविसमा सचिव भेटिदंैनन् न घरको काम गर्न पाइयो न गाविसको काम पूरा हुन्छ’ सापकोटाले पीडा पोखे ।
माडी कल्याणपुर गाविसको बसन्तपुर गाविसमा रहेको प्राथमिक स्वास्थ्य केन्द्रको स्तर वृद्धि गरेर दुर्घटनाका कारण मृत्यु हुने व्यक्तिको पोष्टमार्टम सुविधा पनि सोही केन्द्रमा उपलब्ध गराउन स्थानीयले माग गरे । सार्वजनिक सुनुवाइ कार्यक्रममा सहभागी जिल्ला जनस्वास्थ्य कार्यालयका प्रमुख केहरसिंह गोदारले स्वास्थ्य केन्द्रलाई सकारले १५ बेडको अस्पताल बनाउने निर्णय गरेको जानकारी दिए ।
त्यस्तै, अयोध्यापुरी गाविसका पूर्वअध्यक्ष नारदमणि पौडेलले माडीमा पहिला रहेको इलाका प्रशासन कार्यालय फेरि स्थापना गर्न माग गरे । उनले भने ‘माओवादीको सशस्त्र संघर्षका बेला यहाँबाट गएको इलाका प्रशासन कार्यालय फेरि स्थापना गर्न प¥यो । त्यसो भएमा नागरिकताजस्ता कामका लागि भरतपुर नै धाउनु पर्ने थिएन । इलाका प्रशासन कार्यालय यहाँ ल्याउने तर्फ चाँडो लाग्नुहोस् ।’
चितवनका प्रमुख जिल्ला अधिकारी नरेन्द्रराज शर्माले स्थानीयको समस्या र गुनासा सम्बोधन गर्ने बचन दिए । स्थानीय विकास अधिकारी तिलक पौडेलले चितवनका पाँचै निर्वाचन क्षेत्रमा यस प्रकारको सार्वजनिक सुनुवाइ कार्यक्रम गर्दै जाने योजना रहेको जानकारी दिए ।