काँग्रेस–एमाले नजिकिँदैः ‘शक्ति बाँडफाँडसहित सहमति हुने आशा’

काठमाडौं । राष्ट्रपति डा रामवरण यादवले राजनीतिक सहमतिका आधारमा सरकार गठनका लागि आइतबार आह्वान गरेपछि निर्वाचनबाट पहिलो र दोस्रो ठूलो दल बनेका नेपाली काँग्रेस र नेकपा (एमाले)बीच आज छलफल भएको छ ।
दुवै दलका शीर्ष नेताबीच नयाँ बानेश्वरमा भएको छलफलमा शक्ति बाँडफाँटसहित राजनीतिक सहमतिका आधारमा नयाँ सरकार गठनलगायत विषय  केन्द्रित थियो ।  काँग्रेसले संसदको बैठक सुरु भएको पहिलो दिनमै पार्टी सभापति सुशील कोइरालालाई संसदीय दलको नेतामा चयन गरेको  छ ।
संसदको बैठक सुरु भएकै दिन राष्ट्रपतिले पनि संविधानसभाको बैठक र व्यवस्थापिका–संसद्को अधिवेशन सुरु भएकाले माघ १९ गतेसम्ममा राजनीतिक सहमतिका आधारमा प्रधानमन्त्रीको चयन र निजको अध्यक्षतामा मन्त्रिपरिषद् गठन गर्न व्यवस्थापिका–संसद्मा प्रतिनिधित्व गरेका राजनीतिक दललाई आह्वान गर्नुभएको थियो ।
निर्वाचन सम्पन्न भएपछि काँग्रेस र एमालेले सरकार गठनसहित संविधान लेखनका कार्यमा सहकार्य गरेर अघि बढ्ने सहमति गरेका छन् । काँग्रेसले एमालेसँगको छलफलपछि एमाओवादीलगायत दलसँग सरकार गठनको विषयमा छलफल गर्ने बताइएको छ । छलफलपछि काँग्रेसका सभापति कोइरालाले राजनीतिक सहमतिका आधारमा सहमतिको सरकार गठन गर्न एमालेसँग छलफल गरिएको बताउँदै भन्नुभयो,“सहमतिको सरकार गठनका लागि पूरा कोसिस हुन्छ र बन्नुपर्छ ।”
छलफलमा सहभागी काँग्रेस केन्द्रीय सदस्य डा मीनेन्द्र रिजालले राजनीतिक सहमतिको सरकार गठनका लागि राष्ट्रपतिले आह्वान गर्नुभएको सन्दर्भमा काँग्रेसले पार्टी सभापति एवम् संसदीय दलका नेताको नेतृत्वमा सरकार गठन गर्न दलहरूसँगको वार्ता सुरु  गरेको  बताउनुभयो ।  “नेकपा (एमाले)सँग सरकार गठनका विषयमा छलफल भएको छ, काँग्रेस सभापति एवम् संसदीय दलका नेता सुशील कोइरालाको नेतृत्वमा राजनीतिक सहमतिको सरकार गठन गर्न एमालेले सहयोग गर्ने कुरा भएको छ” केन्द्रीय सदस्य डा रिजालले भन्नुभयो ।
एमालेका उपाध्यक्ष वामदेव गौतमले राष्ट्रपतिले आह्वान गरेबमोजिम आफ्नो नेतृत्वमा सरकार गठनका लागि काँग्रेसले प्रस्ताव राखेको बताउँदै त्यसमा एमाले सहयोग गर्न सकारात्मक छ भन्नुभयो । उहाँले काँग्रेसबाट आधिकारिक पत्रको अपेक्षा गरिएको र पत्र आएपछि पार्टीमा छलफल गरिने जानकारी दिनुभयो ।
सो अवसरमा दुवै दलबीच राष्ट्रपतिको नयाँ निर्वाचन गर्ने नगर्नेबारेमा पनि छलफल भएको बताइएको छ । संविधानसभाको नयाँ निर्वाचन भइसकेको सन्दर्भमा एमालेले राष्ट्रपति र उपराष्ट्रपतिको नयाँ निर्वाचन हुनुपर्ने भनाइ राख्दै आएको छ । काँग्रेसले भने संविधान जारी नभएसम्मका लागि सो निर्वाचन गर्न नहुने अडान राख्दै आएको छ ।
एमाले उपाध्यक्ष गौतमले संविधानसभाको नयाँ निर्वाचन भएकाले ती पदमा पनि नयाँ निर्वाचन हुनुपर्ने अडान राख्नुभयो । एक प्रसङ्गमा उहाँले भन्नुभयो, “एमाले संसदीय दलको नेता चयन सर्वसम्मत ढङ्गले गरिने छ,  सर्वसम्मत नभएमा म पनि उम्मेदवारी दिन्छु ।”