व्यवस्थापिका संसद्को अधिवेशन सुरू

काठमाडौँ । व्यवस्थापिका–संसद्को अधिवेशन आइतबारदेखि प्रारम्भ भएको छ । नेपालको अन्तरिम संविधान, २०६३ को धारा ५१ बमोजिम  राष्ट्रपति डा रामवरण यादवबाट आह्वान भएबमोजिम उक्त अधिवेशन प्रारम्भ भएको हो ।  संसद्का ज्येष्ठ सदस्य सूर्यबहादुर थापाले अधिवेशनको प्रारम्भ गर्दै राष्ट्रपतिले व्यवस्थापिका–संसद्लाई पठाउनु भएको पत्र पढेर सुनाउनुभयो ।
बैठकलाई सम्बोधन गर्दै मन्त्रिपरिषद्का अध्यक्ष खिलराज रेग्मीले अहिलेसम्मका क्रान्ति र आन्दोलनबाट प्राप्त उपलब्धिलाई संस्थागत गर्न संविधानसभाबाट नयाँ संविधान निर्माण गर्ने नेपाली जनताको चाहनालाई साकार पार्नु नै अहिलेको प्रमुख राष्ट्रिय दायित्व भएको बताउनुभयो ।
उहाँले राजनीतिक दलको सुझबुझ र बुद्धिमत्तापूर्ण समझदारीबाट संविधान निर्माण र राज्य व्यवस्था सञ्चालनका क्षेत्रमा देखिएको राजनीतिक र संवैधानिक अन्योलको स्थितिलाई हटाउँदै नेपाली जनताको ताजा अभिमतबाट पुनः संविधानसभाको गठन गर्न सकिएकामा सन्तोष व्यक्त गर्नुभयो ।
‘यही माघ ८ गते सम्मानित संविधानसभाको पहिलो बैठक बसी संविधान निर्माणको प्रक्रिया प्रारम्भ भएको घटनाले अहिले देशवासीमा नयाँ आशाको सञ्चार गराएको छ, यसबाट अधुरो रहेको संविधान निर्माणको कार्यलाई पूर्णता प्रदान गर्ने र जननिर्वाचित सरकारको गठन गर्ने लगायत सबै राजनीतिक र संवैधानिक प्रक्रियाको ढोका खुलेको छ,’ उहाँले भन्नुभयो ।
सभासद्को कार्यकालको पूर्ण सफलताको कामना गर्दै उहाँले जवाफदेहिता अभिवृद्धि गर्ने जनप्रतिनिधियुक्त सम्मानित संस्थाको क्रियाशीलताबाट विगतमा यसको अभावमा महसुस गरिएको रिक्तताको स्वतः अन्त्य भई संवैधानिक प्रक्रियाको थालनी भएकामा हर्ष प्रकट गर्नुभयो ।
संवैधानिक अन्योलको विशिष्ट परिस्थितिमा मूलतः संविधानसभाको निर्वाचन प्रयोजनका लागि गठन भएको वर्तमान मन्त्रिपरिषद्लाई तोकिएको संवैधानिक जिम्मेवारी पूरा गर्दैै संविधानसभाको निर्वाचन सम्पन्न गर्नमा विभिन्न राजनीतिक दल र संविधानसभामा निर्वाचित सदस्यबाट प्राप्त सहयोगप्रति पनि अध्यक्ष रेग्मीले कृतज्ञता  ज्ञापन गर्नुभयो ।
व्यवस्थापिका–संसद्मा प्रतिनिधित्व गरेका ३० दलका प्रमुख नेताले बैठकलाई सम्बोधन गर्ने क्रम जारी छ । बैठकको कार्यसूचीअनुसार आजै संविधानसभा (व्यवस्थापिका–संसद्को कार्यसञ्चालन) नियमावली, २०६५ बमोजिम बैठक एवम् कार्यसञ्चालन प्रस्ताव प्रस्तुत हुनेछ । त्यसैगरी मन्त्रिपरिषद्का अध्यक्ष रेग्मीले नेपालको अन्तरिम संविधान, २०६३ को धारा १५८ बमोजिम राष्ट्रपतिबाट जारी भएको बाधा अड्काउ फुकाउने आदेश सदनसमक्ष पेस गर्ने कार्यक्रम छ । रासस